भांगरभूंय | प्रतिनिधी
भारतान आशियायी खेळांतल्या घोडेस्वारी प्रकारांत वट्ट 41 वर्सांनी पदक जिखलें. घोडेस्वारींत टीम ड्रेसेज प्रकारांत भारताच्या पंगडान भांगरा पदक जिखलें. भारताच्या पंगडांत दिव्यक्रीत सिंग, सुदिप्ती हजेला छेडा, अनुष अगरवाल्ला हांचो आस्पाव आशिल्लो.
भारतान इक्वेस्टेरियन (घोडेस्वारी) ड्रेसेज पंगडान चीन आनी हॉंगकॉंग सारक्या बळिश्ट पंगडांत हारयले. भारतान वट्ट 209.205 गूण मेळयले. आशियायी खेळांत काल भारतान मेळयिल्लें हें तिसरें पदक थारलें. सकाळीं नौकायनांत भारताच्या नेहा ठाकूरान रुप्या पदक जाल्यार इबादत अलीन कांश्या पदक जिखिल्लें.
ज्युडोंत तुलिका मानाक कांशें चुकलें
ज्युडोंत तुलिका मानाक 75 कील वजन गटांत कांश्या पदक चुकलें. मजगतीं, अवतार सिंग दादल्यांच्या 100 कील वजन गटाचे क्वॉर्टरफायनलींत पावला. क्वॉर्टरींत तो युएईच्या दजफर कोस्तोवा आड खेळटलो.
फेन्सींगः भवानी देवी हारली
फेन्सिंगेंत भवानी देवीचें आशियायी खेळांत पदक जिखपाचें सपन काल क्वॉर्टरफायनलींत सोंपलें. भवानीक सेबर इवेंटाचे क्वॉर्टरफायनलींत संवसारीक क्रमवारींत 11वे सुवातेर आशिल्ले आनी 2018त रुप्या पदक जिखपी शाओ याकी कडल्यान 7-15 फरकान हार घेवची पडली.
नेमबाजीः भारत चवथे सुवातेर
10 मिटर अॅर रायफल मिश्र प्रकारांत रमित आनी दिव्यांश सिंग हांकां कांश्या पदका खातीर जाल्ले मॅचींत हार घेवची पडली.
टॅनीसः अंकिता रैना क्वॉर्टरींत
अंकिता रैनान बायलांच्या टॅनीस एकोड्या गटांतले क्वॉर्टरफायनलींत सुवात मेळयली. तिसरे फेरयेंत तिणें हॉंगकॉंगचे आदित्या करुणारत्नेक 6-1 आनी 6-2 अशा सरळ सेटांनी हारयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
