भांगरभूंय | प्रतिनिधी
भारताच्या दादल्यांच्या हॉकी पंगडान आशियायी खेळाचे हॉकी सर्तींतले सेमी फायनलींत दक्षीण कोरिया पंगडाक 5-3 अशा गोल फरकांनी हारोवन फायनलींत सुवात मेळयली.
भारतान जैताची लय कायम राखली. भारतान पयल्या क्वॉर्टरांत 3-0 अशी आघाडी घेतिल्ली. मॅची सुरू जावन पांच मिनटां जाता थंय आसा हार्दिक सिंगान फिल्ड गोल केलो. ते उपरांत मनदीप सिंगान 11व्या मिनटाक गोल करून आघाडी 2-0 केली. पयल्या क्वॉर्टराच्या निमाण्या खिणाक ललित उपाध्यायान पॅनल्टी कॉर्नराचेर गोल करून स्कोर 3-0 केलो.
दुसऱ्या क्वॉर्टरांत भारताक गोल करपाच्यो चड संदी मेळूंक ना. भारता वतीन चवथो गोल अमित रोहदासान पॅनल्टी कॉर्नराचेर केलो. ह्या क्वॉर्टरांत कोरियान दोन गोल केले. हे दोनूय गोल मंजे जंग हाणें केले. मध्यांतरा मेरेन भारत 4-2 असो मुखार आशिल्लो.
तिसऱ्या क्वॉर्टरांत कोरियान भारताचेर आपलो शेक दवरपाचो यत्न केलो. मंजेन आपलो आनी पंगडाचो तिसरो गोल करून भारताची आघाडी उणी केली. चवथ्या क्वॉर्टरांत लेगीत कोरियान आपलें आक्रमण चालूच दवरलें. भारतान लेगीत गोल करपाचो यत्न केलो. अखेरेक 54व्या मिनटाक अभिषेकान गोल करून भारताचो स्कोर 5-3 केलो. उपरांत भारतान हो स्कोर अखेर मेरेन कायम दवरीत फायनलींत सुवात मेळयली. दुसरी सेमी फायनल चीन आनी जपान ह्या पंगडां मदीं जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
