भांगरभूंय | प्रतिनिधी
येजमान भारतान इंग्लंडा आड चालू आशिल्ले तिसरे टॅस्टी पयली आपली पकड घट्ट केल्या. पयल्या डावाच्या आदाराचेर 126 धांवड्यांची आघाडी घेवपी भारतान दुसऱ्या डावांत 2 विकेटी वगडावन 196 धांवड्यो केल्यात. अशे तरेन ताची वट्ट आघाडी 322चेर पावल्या.
ते पयलीं इंग्लंडान तिसऱ्या दिसा 2 बाद 207 धांवड्यां वयल्यान मुखार खेळपाक सुरवात केली आनी ताचो डाव 319 धांवड्यांचेर सोंपलो. ताच्या उरिल्ल्या आठ बॅठ्समनांनी 112 धांवड्यांची भर घाली.
इंग्लंडा वतीन बेन डकेटान 151 बॉलांनी 153 धांवड्यो केल्यो. हातूंत 23 चवक्यांचो आनी 2 सक्यांचो आस्पाव आशिल्लो. डकेटा खेरीत हेर एकाय बॅट्समनाक व्हड खेळी करपाक जमली ना. भारता वतीन मोहम्मद सिराजान सगल्यांत चड 4 विकेटी घेतल्यो.
भारतान आपल्या पयल्या डावांत मुखेली रोहीत शर्मा (131) आनी रवींद्र जडेजा (112) हांच्या शेंकड्यां नेटार 445 धांवड्यो केल्ल्यो.
मजगतीं, भारताच्या दुसऱ्या डावांत यशस्वी जयस्वालान शेंकडो मारलो. तो 104 धांवड्यो करून रिटायर्ड हर्ट जालो. शुभमन गिल 65 आनी कुलदीप यादव 3 धांवड्यो करून खेळटा. रोहित शर्मा 19 आनी रजत पाटीदार शुन्याचेर बाद जालो. इंग्लंडा वतीन टॉम हार्टले आनी जो रुट हाणें एकेक विकेट घेतली.
मजगतीं, इंग्लंडान 2 बाद 207 धांवड्यां वयल्यान मुखार खेळपाक सुरवात केली. डकेटान 133 आनी रुटान 9 धांवड्यां वयल्यान आपली खेळी मुखार व्हरपाक सुरवात केली. पूण, रुट 18 धांवड्यांचेर रिव्हर्स स्कूप करपाच्या यत्नांत जसप्रीत बुमराचो शिकार थारलो. ते उपरांत जॉनी बॅयरस्टोक खातें लेगीत उगडपाक जमलें ना. डकेट लेगीत 153 धांवड्यो करून कुलदीप यादवाचो शिकार थारलो.
पयलें सत्र सोंप मेरेन इंग्लंडाचो स्कोर 5 बाद 290 आशिल्लो. दुसऱ्या सत्रांत इंग्लंडाचो स्कोर 5 बाद 299 आशिल्लो. पूण, उपरांत ताच्या बाकीच्या बॅट्समनांनी फकत 20 धांवड्यांची भर घाली.
बेन स्टोक्स 41, बेन फोक्स 13, टॉम हार्टले 9, रेहान अहमद 6 आनी जेम्स अॅण्डरसन 1 धांवडी करून बाद जालो.
भारताक दुसऱ्या डावांत यशस्वी आनी रोहित हाणें जलद सुरवात करून दिली. पूण, रोहित 19 धांवड्यो करून हार्टलेचो शिकार थारलो. ते उपरांत यशस्वीन शुभमना वांगडा मेळून पंगडाचो स्कोर 100 वयर व्हेलो.
यशस्वीन 35 धांवड्यो केल्या उपरांत जलद रितीन धांवड्यो करपाक सुरवात केली. ताणें 80 बॉलांनी अर्द शेंकडो नोंदयलो, जाल्यार 122 बॉलांनी शेंकडो पुर्ण केलो. ताच्या वांगडा खेळटना गिलान लेगीत आपलो अर्द शेंकडो पुर्ण केलो. यशस्वीची फाट दुखपाक लागिल्ल्यान 104 धांवड्यांचेर रिटायर्ड हर्ट जालो.
चवथे सुवातेर बॅटिंगेक आयिल्ल्या पाटीदाराक खातें लेगीत उगडपाक जमलें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
