भारताचो परतून गोलांचो पावस

भांगरभूंय | प्रतिनिधी

मुखेली हरमनप्रीत सिंग आनी मनदीप सिंग हांचे हॅट्रिके नेटार किताबाचो मुखेल दावेदार आशिल्ल्या भारतान आशियायी खेळांतल्या दादल्यांच्या हॉकी सर्तींत सिंगापूर पंगडाक 16-1 अशा व्हडा फरकान हारयलो सेगीत दुसऱ्या जैताची नोंद केली. भारतान आपले पयले मॅचींत उझबेकिस्तानाक 16-0 अशा फरकान हारयिल्लो.

टोकियो ऑलिम्पिकांत कांश्या पदक जिखपी भारतान सेगीत दुसरे मॅचींत सोंपें जैत जोडलें.

भारत अ गटांतली आपली फुडली मॅच 28 सप्टेंबराक सध्याचो वस्ताद जपाना आड खेळटलो. भारता वतीन हरमनप्रीतान चार (24वें, 39वें, 40वें आनी 42वें मिनट), मनदीपान तीन (12वें, 30वें आनी 51वें मिनट), वरुण कुमारान दोन (55व्या मिनटाक), अभिषेकान दोन (51वें आनी 52वें मिनट), व्ही एस प्रसाद (23वें मिनट), गुरजंत सिंग (22वें मिनट), ललित उपाध्याय (16वें मिनट), शमसेर सिंग (38वें मिनट) आनी मनप्रीत सिंग (37वें मिनट) हांणी गोल केले. सिंगापूरा वतीन एकोडो गोल मोहम्मद जकी बिन जुल्करनैनान 53व्या मिनटाक केलो.

भारतान सावकाश सुरवात केली. पूण, बॉलाचेर नियंत्रण दवरलें. पुर्ण खेळ सिंगापूराच्या सर्कलांत जालो. भारताचो गोलकीपर परतून एकदा मूक प्रेक्षक जालो.