भांगरभूंय | प्रतिनिधी
नवी दिल्ली, खबरां संस्था ः दर वर्सा भारत देशांतल्यान जायते लोक स्थलांतरीत जातात. कांय जाण नोकरे खातीर, वेवसायाक जाल्यार कांय जाण शिक्षणाक वतात. मेळिल्ले म्हायती प्रमाण, परदेशांतल्या भारतीयांचो आंकडो 1.8 कोटी मेरेन आसा. भारतांतल्यान स्थलांतरीत जाल्ल्या लोकांनी भारतांत व्हड प्रमाणात पयशे धाडून विक्रम केला.
इंटरनॅशनल ऑर्गनायझेशन फॉर मायग्रेशनान संवसारीक स्थलांतराचेर जाहीर केल्ल्या अहवालात ही म्हायती दिल्या. अहवाला प्रमाण युएई, अमेरिका आनी साउदी अरेबियांत खूब भारतीय लोक रावतात. ह्या लोकांनी भारतांत व्हड प्रमाणांत पयशे धाडल्यात अशें अहवालात सांगलां.
100 अब्ज डॉलरार पावलो
परदेशांतल्यान पयशें धाडपाच्या वळेरेंत भारत पयल्या क्रमांकाचेर आसा. पयल्या धा मदीं भारता सयत पाकिस्तान आनी बांगलादेशाचोय आस्पाव आसा. भारताक 111 अब्ज डॉलर मेळ्ळ्यात. 100 अब्ज डॉलरार पावपी भारत हो संवसारांतलो पयलो देश थारलो.
हें वळेरेंत भारता उपरांत मेक्सिको दुसरो, चीन तिसरो, फिलीपीन्स चवथो आनी फ्रांस पांचवे क्रमांकाचेर आसा. जाल्यार पाकिस्तानचो सवो क्रमांक आसा. आनी बांगलादेश आठवे सुवातेर आसा. पाकिस्तान आनी बांगलादेश ह्या दोनूय देशांतल्यान व्हड प्रमाणांत स्थलांतर जाता.
संवसारांत भारतांतल्यान सगळ्यांत चड स्थलांतर जाता. कारण भारतांत लोकसंख्या व्हड आसा. ताका लागून स्थलांतराचें प्रमाणूय चड आसा. मजगतीं, अहवाला प्रमाण देशांतल्या वट्ट लोकसंख्येंत 1.3 टक्के स्थालंतर भारतीय आसात. युएई, अमेरिका, साउदी अरेबिया ह्या देशांनी व्हड प्रमाणांत भारतीय लोकांचे स्थलांतर जाल्याची म्हायती ह्या अहवालांत दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
