भांगरभूंय | प्रतिनिधी
भारत आनी इंग्लंड ह्या पंगडां मदीं आयज हांगाच्या बाराबती मैदानाचेर माळेंतली दुसरी वन डे मॅच जातली. फाटल्या कांय म्हयन्यां सावन धांवड्यो करपाक झुजपी भारताचो मुखेली रोहीत शर्मा आनी स्टार बॅट्समन विराट कोहलीची तंदुरुस्ती हाचेर सगल्यांची नदर आसतली.
नागपूरांत जाल्ले पयले मॅचींत भारतान 4 विकेटींनी जैत जोडून तीन मॅचींचे माळेंत 1-0 अशी आघाडी घेतिल्ली. आयची मॅच जिखून जिखपाचो ताचो यत्न आसतलो. उजव्या पांयाचें धोंपर सुजिल्ल्यान कोहलीक पयली मॅच चुकिल्ली.
कोहलीची दुखापत गंभीर ना. तो आयचे मॅचींत खेळटलो अशें भारताचो उप मुखेली शुभमन गील हाणें स्पश्ट केलां. कोहलीन पंगडा वांगडा सराव लेगीत केला. ही ताच्या चाहत्यां खातीर खोशयेची गजाल आसा. पूण, 11 वांगड्यांचो पंगड वेंचपाक पंगड वेवस्थापनाक मात्शे त्रास जावये. फाटले मॅचींत कोहलीचे सुवातेर श्रेयस अय्यराची पंगडांत निवड केल्ली. ताणें 36 बॉलांनी 59 धांवड्यो करून पंगडांतली आपली सुवात निश्चीत केल्ली. ताका लागून कोहली काय अय्यराक खेळोवचो वा दोगांकूय खेळोवन ओपनर यशस्वी जयस्वालाक भायर दवरचो काय असो प्रस्न लेगीत पंगड वेवस्थापनाक पडपाक शकता.
जयस्वालाक पयले मॅचींत म्हणपा सारकें प्रदर्शन करपाक जमूंक नाशिल्लें. ताका भायर बसोवन रोहीत आनी गील डावाची सुरवात करपाक शकता.
कोहली तंदुरुस्त जावन पुनरागमन करता जाल्यार ताच्या फॉर्माचेर नदर आसतली. फाटल्या कांय मॅचीं सावन ताका म्हणपा सारक्यो धांवड्यो करपाक जमूंक ना. ऑस्ट्रेलियेचे भोंवडेर धांवड्यो करपाक ताका संघर्श करचो पडिल्लो. तशेंच दिल्ली वतीन रणजी मॅचींत खेळटना ताका फकत स धांवड्यो करप शक्य जाल्ल्यो. पूण, कोहलीचो वन डे रॅकॉर्ड उत्कृश्ट आसा. ताका 14 हजार धांवड्यो पूर्ण करपाक फकत 94 धांवड्यांची गरज आसा.
कोहली भशेन मुखेली रोहीत लेगीत धांवड्यो करपाक संघर्श करीत आसा. पयले मॅचींत तो फकत दोन धांवड्यो करून बाद जाल्लो. रोहीतान पोरूं श्रीलंके आड कोलंबोंत जाल्ले मॅचींत 64 धांवड्यो केल्ल्यो. ते उपरांत ताका वन डे मॅचींत एक लेगीत अर्द शेंकडो मारपाक जमूंक ना. आयचे मॅचींत लेगीत ताका धांवड्यो करपाक अपेस येता जाल्यार ताच्या फॉर्माचेर आनी फुडारा विशीं प्रस्नचिन्न उप्रासतलो.
भारताचो बॉलींग विभाग लेगीत घटमूट आसा. फास्ट बॉलर मोहम्मद शमीन पुनरागमना उपरांत बरें प्रदर्शन केलां. चॅम्पियन्स ट्रॉफी पयलीं भारता खातीर हो एक बरो संकेत आसा.
फाटले मॅची वरवीं वन डेंत पदार्पण करपी हर्षित राणान बरी बॉलींग केल्ली. फास्ट बॉलर जसप्रीत बुमरा तंदुरुस्त जायना जाल्यार हर्षित राणा कडेन चॅम्पियन्स ट्रॉफी खातीर पंगडांत सुवात मेळोवपाची संद आसा.
दुसरे वटेन इंग्लंड ही मॅच जिखून माळेंत बरोबरी सादपाचो यत्न करतलो. ताच्या बॅट्समनांक आक्रमक खेळी करपाचेर ब्रेक लावपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
