भांगरभूंय | प्रतिनिधी
वॅस्ट इंडिजा आड चालू आशिल्ले वन डे माळेंतले दुसरे मॅचींत भारताचो डाव 40.5 ओव्हरींनी फकत 181 धांवड्यांचेर सोंपलो. ओपनर इशान किशनान सगल्यांत चड 55 धांवड्यो केल्यो. शुभमन गिलान 34 धांवड्यांचें योगदान दिलें. ह्या दोगांक सोडले जाल्यार एकाय बॅट्समनाक व्हड खेळी करपाक जमली ना. विंडिजा वतीन गुडाकेश मोती आनी रोमारियो शेफर्ड हांणी दरेकी तीन विकेटी घेतल्यो, जाल्यार अल्झारी जोसेफाक दोन विकेटी फावो जाल्यो. जेडन सिल्स आनी यानी कॅरी हांकां दरेकी एक विकेट मेळ्ळी.
सदचो मुखेली रोहीत शर्मा आनी विराट कोहली हांचे गैरहाजेरेंत भारताची बॅटींग फळी सामकी बाबत दिश्टी पडली. ओपनरांनी 90 धांवड्यांची भागिदारी केली. पूण, पयली विकेट पडल्या उपरांत डाव कोसळपाक लागलो. सुर्यकुमार यादवान 24 आनी शार्दुल ठाकूरान 16 धांवड्यांची खेळी केली. मुखेली हार्दीक पांड्या 7 संजू सॅमसन 9 आनी रवींद्र जडेजा 10 धांवड्यो करपाक शकलो.
मजगतीं, इशान किशनान कारकिर्दींतलो पांचवो अर्द शेंकडो पुर्ण केलो. ताणें 55 बॉलांनी 55 धांवड्यो केल्यो. किशनान सेगीत दुसरे मॅचींत अर्द शेंकडो मारलो. जाल्यार शुभमन गिलान आंतरराष्ट्रीय क्रिकेटींत 2500 धांवड्यो पुर्ण केल्यो. ताणें अजून मेरेन आंतरराष्ट्रीय क्रिकेटींत सात शेंकडे आनी णव अर्द शेंकडे मारल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
