भारताचो गोपी थोटाकुरा गेलो अंतराळाचे भोंवडेर
भांगरभूंय | प्रतिनिधी
नवी दिल्ली, खबरां संस्था : ऍमेझॉनचे संस्थापक जेफ बेझोस हांच्या स्पेस कंपनी ब्ल्यू ओरिजिनान आयतारा (१९ मे) न्यू शेपर्ड रॉकेटच्या मजतीन ६ जाणांक अंतराळांत धाडले. हातूंत आंध्र प्रदेशांतल्या गोपी थोटाकुरा हांचो आसपाव आसा. ३० वर्सां पिरायेचो गोपी पर्यटक म्हणून अंतराळांत वचपी पयलो भारतीय थारतलो.
१९८४ त भारतीय लश्कराचे विंग कमांडर राकेश शर्मा हांचे उपरांत अंतराळांत वचपी गोपी हे दुसरे भारतीय. गोपी एक पायलट आनी उद्देजक जावन आसात. तांणी फ्लोरिडा हांगच्या एम्ब्री-रिडल एअरोनॉटिकल विद्यापीठांतल्यान पदवी मेळयली आनी दुबयंत एमिरेट्स एव्हिएशन युनिव्हर्सिटींत एव्हिएशन मॅनेजमेंटचो अभ्यास केलो.
ब्ल्यू ओरिजिनाच्या मतान गोपी एक पायलट आनी एव्हिएटर जावन आसात. जे गाडी चलोवचे पयलीं विमान चलोवपाक शिकिल्ले. तांणी आंतरराष्ट्रीय वैजकी जेट पायलट म्हणून काम केलां. वेवसायीक विमानां सोडल्यार गोपी झुडूप, एरोबीक आनी सिप्लेन, ग्लायडर आनी हॉट एअर बलूनय चलयतात.
आनीक पांच जाण गेल्यात
गोपी थोटाकुरा हांचे सयत ब्ल्यू ओरिजिनान आनीक ५ जाणांक अंतराळांत प्रवास करपाक धाडलां. हातूंत मेसन एंजेल, सिल्वेन चिरॉन, केनेथ एल. हेस, कॅरोल स्कॉलर, गोपी थोटाकुरा आनी यूएस एअर फोर्सचे आदले कॅप्टन एड ड्वाइट.
ब्ल्यू ओरिजिनाचें सातवें मानवी स्पेसफ्लायट, NS-25, आयतारा सकाळीं वेस्ट टेक्सासांत लॉन्च सायटा वयल्यान गेलें अशें कंपनीन सोशियल मिडया वरवीं कळयलां.
आदलो मिशन अपेशी
१२ सप्टेंबर २०२२ दिसा पयलें ब्ल्यू ओरिजिन स्पेस मिशन लॉंच केलें. मात, कांय सेकंदां उपरांत रॉकेटाक उजो लागलो. उपरांत डिसेंबर २०२३त ताची परत चाचणी केली. उपरांत आयतारा सकाळीं अमेरिकेंतल्या टेक्सास शारांतल्यान ताका अंतराळांत सोडलें.
ब्ल्यू ओरिजिन ही स्पेस कंपनी २००० त सुरू
जेफ बेझोस हांणी २००० त ब्ल्यू ओरिजिन हे स्पेस कंपनीची स्थापना केली. ह्या निधी खातीर, ते तांचे ऍमेझॉनचे शेअर्स विकतात. ब्ल्यू ओरिजिनाचे वॉशिंग्टन हांगच्या मुख्यालयांत ३,५०० परस चड कर्मचारी आसात. जेफ बेझोस हांची कंपनी ब्ल्यू ओरिजिनची आनी एलन मस्क हांचे कंपनी स्पेसएक्स मदीं बरीच नेटान सर्त चल्ल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
