भांगरभूंय | प्रतिनिधी
योग्य निर्णय घेवपाचेर हांव विस्वास दवरिना. हांव निर्णय घेतां आनी मागीर तो जिद्द, मेहनतीन योग्य थारायतां.
उतरां आसात, एके म्हान व्यक्तीचीं, जिणें देशाक खूब कितें दिलें. हय, ती व्यक्ती म्हणल्यार उद्देगपती रतन नवल टाटा. तांच्या मरणान उद्देग मळा वयलें एक पर्व सोंपलां. देशान आपलें अस्सल कोहिनूर रत्न व्हगडायलां. रतन टाटान भारतीय उद्देगाक आंतरराष्ट्रीय मळाचेर एक वेगळी वळख करून दिली. लाखांनी लोकांचे संवसार उबे केले. टाटा हे देशांतले एक परोपकारी, वादांत सांपडूंक नाशिल्ले आगळें व्यक्तीमत्व आशिल्लें. विस्वास, प्रामाणीकपणा, खात्री हें टाटा उद्देग समुहाचें दुसरें नांव म्हणल्यार अतिताय थारची ना. गुपचूप दान करपी, रस्त्यां वयल्या सुण्यां खातीर निमाणे मेरेन वावुरपी म्हूणय तांची वळख आसा. गिरेस्त उद्देगसमुहाचे धनी आसूनय ते सदांच नम्र, सादे रावले. खंयच्याय सुवाळ्याक आसल्यार पसून गरज तितलेंच उलोवप, सामान्य मनशांची विचारपूस करप हो तांचो खाशेलो गूण.
मोटारी सावन मिठा मेरेन, हाॅटेलां ते च्या मेरेन, विमानां, स्टील, ट्रक ….. सगल्या मळांचेर टाटा कंपनी वावुरता. जे. आर. डी. टाटा फाटल्यान हे कंपनींत रतन टाटान हांणी कर्तृत्व गाजयलें. जेआरडी उपरांत 1991 वर्सा ते टाटा कंपनी समुहाचे अध्यक्ष जाले. 2012 त पिरायेची पंचाहत्तरी जाय मेरेन तांणी तें पद यशस्वीपणान सांबाळ्ळे. तांचे कारकिर्दींत कंपनीचो फायदो पन्नास टक्के वाडलो. चडशी येणावळ जॅग्वार- लॅण्डरोव्हर गाडयो, टेटली सारक्या कंपनीच्या विदेशांतले विक्रेंतल्यान आयल्या. तांणी फोर्ड कंपनींच्या ह्या दोनूय गाडयांचे विभाग विकत घेतले. निवृत्ती वेळार वाचन, सुणीं, संगीत ह्या छंदां कडेन लक्ष दितलों, अशें तांणी थारायिल्लें. मात उत्तराधिकारी सायरस मिस्त्री हांचे कांय निर्णय कंपनीक माल वतात, तें पळोवन कंपनीन मिस्त्री हांकां आॅक्टोबर 2016 त पदा वयल्यान काडले आनी फेब्रुवारी 2017 त नवो अध्यक्ष मेळ मेरेन रतन टाटान परत अध्यक्षपद स्विकारचें पडलें. फाटलीं सात वर्सां मात ते निवृत्तीची जीण जगले.
रतन टाटा हे नमळाये खातीर प्रसिद्ध. उलोवपा परस कृती करून दाखोवपी. टाटा इंडिया वेळार जगप्रसिद्ध कार उद्देजक बिल फोर्ड हांणी, तुमकां कांय खबर ना जाल्यार तुमी ह्या उद्देगांत देंवले कित्याक? तुमचो कार विभाग विकत घेवन आमी तुमकां मजतूच करतले, अशें म्हणलें. टाटा कांय उलोवंक नात. कार विभाग विकलो ना. 2008 त जेन्ना फोर्ड कंपनी लुकसाणेंत गेली तेन्ना टाटान जॅग्वार- लॅण्डरोव्हर विकत घेवपाचो प्रस्ताव फोर्डा मुखार दवरलो. 2.3 अब्ज डॉलर्स दिवन तांणी ते दोन विभाग विकत घेतले तेन्ना खुद्द फोर्ड हांणी, तुमी म्हजी व्हडली मजत केली, अशें म्हणलें. प्रिन्स चार्ल्स हांचे हस्तुकीं 2018 त रतन टाटांक जिणेगौरव पुरस्कार मेळपाचो आशिल्लो. पूण ऐन वेळार तांकां वचपाक मेळूंक ना. चार्ल्स हांकां ताचे फाटलें कारण कळ्ळें आनी तांच्या तोंडांत उतरां आयलीं, हाका म्हणटात मनीस. आपलो एक सुणो दुयेंत पडिल्ल्यान ताका सोडून इंग्लंडाक वचप योग्य न्हय, म्हूण टाटा थंय गेले नात. गोंयांत मेळिल्लो सुणो तांणी पोसला. ताचें नांव गोवा. आयज ताका निमाण्या विधी वेळार खासा हाडिल्लो. टाटाच्या घरांत, कार्यालयांत भटक्या सुण्यांक मुक्तद्वार आसा. तांच्या कर्मचाऱ्यांक तशें सांगुनच दवरलां. सुण्यां खातीर तांणी बरोच वावर केला.
तांकां वाचनाचें पिशें आशिल्लें. म्हान मनशांच्या येशाच्यो कथा वाचपाक आवडटाल्यो. आदले इंग्लीश, खास करून शास्त्रीय संगीत, वाद्य संगीत तांकां आवडटालें. सिम्फनी चड आवडीची. पियानो शिकपाची तांची इत्सा आशिल्ली. गाडयांची तांकां खूब आवड. पावसांत भिजत मोटारसायकली वयल्यान टिबल सीट वचपी कुटुंबाक पळोवन तांकां नॅनो गाडयेची कल्पना सुचिल्ली. विदेशांत शिकताले तेन्ना तांणी हाॅटेलांत आयदनां घासपाचें पसून काम केलां. तुमी गिरेस्त आसात, हें विसरपाक लावपी खीण तुमकां बरी देख दिता, अशें ते म्हणटाले. टाटा स्टिलाच्या दुकानांत पसून तांणी काम केलां. टाटा हांच्या मरणाच्यो खबरो काल दीसभर सोशल मिडियाचेर चलताल्यो. शेंकड्यांनी लोकांनी तांकां आर्गां ओंपल्यांत. हाचें खाशेलपण म्हणल्यार टिका, थोमण्यां खातीर कुप्रसिद्ध आशिल्ल्या सोशल मिडियाचेर तांचे विशीं टिकेची एक ओळ पसून कोणे बरोवंक ना. हाचे वयल्यान रतन टाटा हे कितले म्हान तें कळटा. गिरेस्त लोकां विशीं सामान्य मनशांक सहसा मोग नासता. फाटल्यान तरी ते ताका नाक मुड्डिटात. टाटा हे घडये एकसुरे गिरेस्त आसतले, जांकां सामान्यांचो, गरिबांचो मोग, आदर मेळ्ळो. हीच तांची खरी गिरेस्तकाय. आव्हानांक धिटायेन आनी जिद्दीन तोंड दिवचें, कारण आव्हान म्हणल्यार जिविताचो एक आदारस्तंभ, अशें ते म्हणटाले. तांच्या मरणान भारतीय उद्देश विश्वाचो एक आदार ना जाला. तांकां आर्गां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
