भारताचे विविधतायेंतलो एकवट कायम उरपाची गरज

भांगरभूंय | प्रतिनिधी

खासदार शशी थरूर: मडगांवां दत्ता दामोदर नायक हांचो भोवमान

मडगांव: भारत हो विवीध भाशांचो, भुगोलीक रचनांचो, विवीध जाती-धर्मांचो आनी संस्कृतायेचो देश आसून विविधतायेंतलो एकवट कायम उरपाची गरज आसा. लोकशायेंत संविधानान नागरिकांक दिल्ले हक्क आनी स्वातंत्र्य कायम उरचें, हो खऱ्या भारताचो गाभो आनी विचार आसा अशें मत आदले केंद्रीय मंत्री आनी खासदार शशी थरूर हांणी मांडले.

दक्षीणायन अभियान गोंय आनी नागरी समाज गोंय हांच्या जोड पालवान साहित्य अकादेमी पुरस्कारान भोवमानीत साहित्यीक आनी उद्देजक दत्ता दामोदर नायक हांच्या सत्तरी निमतान काल नागरी भोवमान केलो.
मडगांवां गोमंत विद्यानिकेतन सभाघरांत जाल्ले हे कार्यावळींत खासदार शशी थरूर हे मुखेल सोयरे म्हूण हाजीर आशिल्ले. आयडिया ऑफ इंडिया ह्या विशयाचेर तांणी उलोवप केलें. भाशाशास्त्रज्ञ आनी दक्षीणायन अभियानाचे संस्थापक डॉ. गणेश देवी, साधना सातोळ्याचे संपादक विनोद शिरसाट आनी गोंयचे नामनेचे उद्देगपती अवधूत तिंबलो हे मानाचे सोयरे म्हूण हाजीर आशिल्ले. तशेंच दक्षीणायन अभियान गोंयचे निमंत्रक अ‍ॅड. क्लिओफात आल्मेदा कुतिन्हो आनी नागरी समाज गोंयचे डॉ. फ्रान्सिस्को कुलासो हे माचयेर हाजीर आशिल्ले.

थरूर हांणी आपल्या उलोवपांत भारतांतल्या विवीध घडणुकांचो नियाळ घेतलो. भारताचो आतां मेरेनचो प्रवास आनी लोकांच्या उदरगती खातीरचो हातभार आनी आयिल्ल्या आव्हानांचेर उलोवप केलें. भास, धर्म, भेस, संस्कृती, भुगोलीक रचना अशा विविधतायेच्या देशांत सर्वधर्मीय एकवटान राबितो करीत आयल्यात. सद्या कांय जाण हातूंत धर्मीक दुस्वास पातळावपाचें काम करीत आसात. भारतीय लोकशाय ही संवसारांत नांवाजिल्ली आसून संविधानाक लागून लोकांक मुलभूत हक्क प्रदान केल्यात. सद्या देशांत संविधानाचो आदर राखिनात. लोकांचे हक्क आनी अधिकार उणे करपाचो यत्न चुकीचो आसा अशें तांणी म्हणलें.

मुखार उलयतना थरूर हांणी म्हणलें, लोकांचो विरोध आसून लेगीत लोकां खातीर त्रासदायक कायदे करतात. विवीध मार्गांतल्यान लोकांचें स्वातंत्र्य झोमून घेत आसात. हें सगलें बंद जावपा खातीर योग्य धोरणांची गरज आसा. धर्माच्या आदाराचेर दोन देश ही संकल्पना कोणाकूच मान्य ना. धर्म हो निकश खंयच लावंक शकनात. हिंदू धर्मांत सगल्यांक एक मानतात. मनशाक मनीस म्हणून स्विकारप गरजेचें आसा. भारतान लडिल्ले लडायेंत सर्वधर्मीय जवानांनी देशा खातीर प्राण ओंपल्यात. सर्वधर्मीय एकठांय नांदतात हो भारत आसा. इतिहास बदलून लोकांची दिशाभूल करपाचो यत्न जावप दुर्दैवी आसा. विविधतायेंत एकवट सांबाळपी देशांत एक देव, एक धर्म आनी एक प्रार्थना पुस्तक ही संकल्पना रुजोवप शक्य ना, अशें सांगून थरूर हांणी भाजपाचे कार्यपद्दतीचेर टिका केली.

अवधूत तिंबलो हांणी म्हणलें, दत्ता नायक हो व्हड मनीस, पूण गोंय ल्हान आसा. दत्ता नायक सदांच गोंया खातीर कितेंय तरी करपाक जाय अशें सेगीत सांगतात ते आमकां करचें पडटलें. खंयच्याय विशयाचेर ठाम मत मांडपाक ते फाटीं फुडें पळयनात.
गोंय सद्या अर्थीक आनी राजकी नदरेन खंय चल्लां हाचो विचार जावपाची गरज आसा अशेंय तिंबलो हांणी म्हणलें.

थेट मांडणी आनी कसलेच तरेचो गोंदळ ना अशें लिखाण दत्ता नायक हांणी केलें. जिणे प्रवसांतल्यान ते घडले हें दिसून येता. एका नास्तिकाचो गाभारो ह्या पुस्तकांत तांणी आपूण नास्तीक कित्याक आसा हें सांगलां. भारतांत ते प्रमाण 3 टक्के आसा. नास्तिकांनी बरयल्यार धर्माच्या नांवा खाला धर्मांधवृत्ती समाज इबाडपाचे काम करीत आसात तांची धार उणी जातली अशें विनोद शिरसाट हांणी सांगलें.

कुतिन्हो हांणी सांगलें, तीन दसकां सावन जे विचार ते रुजयत आसात, फुडें व्हरत आसात तांचो हो भोवमान आसा. साहित्य अकादेमी पुरस्कार जैतिवंत आनी उद्देजक आसून लेगीत समाजा खातीर सेगीत धडपडत आसतात. विद्यार्थी चळवळी सावन ते आतां मेरेन ते खूबशा चळवळींनी आसात. एखाद्या मुद्याचेर थेट विचार मांडपाचें काम तांणी केलां. आपली बाजू ते ठामपणान मांडटात अशेंय तांणी म्हणलें.