भांगरभूंय | प्रतिनिधी
भारताचे क्रिकेटीची सेवा करपाक आपूण परत आयलो. पूण, हे खेपे आपली भुमिका वेगळी आसतली. पूण, ध्येय सदचे भशेनूच आसा अशें भारताच्या क्रिकेट पंगडाचो नवो प्रशिक्षक गौतम गंभीरान म्हणलां.
राहुल द्रविडा उपरांत भारताच्या क्रिकेट पंगडाचो मुखेल प्रशिक्षक कोण हाची जाप अखेर काल मेळ्ळी. आदलो खेळगडो आनी 2007 तशेंच 2011 वर्सा भारताक संवसारीक वस्तादपण मेळोवन दिवपाक मोलादीक योगदान दिवपी बॅट्समन गौतम गंभीराची मुखेल प्रशिक्षकपदा खातीर नेमणूक केल्या.
भारतीय क्रिकेट नियामक मंडळाचे (बीसीसीआय) सचीव जय शाह हांणी गौतम गंभीराची मुखेल प्रशिक्षकपदा खातीर नेमणूक केल्ल्याची औपचारीक घोशणा केली. संवसारीक टी-20 सर्ती उपरांत राहुल द्रविडाचो कार्यकाळ सोंपिल्लो. ताणें आपलो कार्यकाळ आनीक वाडोवपाक न्हयकार दिल्ल्यान नव्या प्रशिक्षका खातीर सोद चालू आशिल्लो. हातूंत गंभीराचें नांव सगल्यांत मुखार आशिल्लें.
भारतीय पंगडाचो मुखेल प्रशिक्षक म्हणून गौतम गंभीराक येवकार आपल्या खातीर अभिमानाची गजाल आसा. आधुनीक काळांत क्रिकेट वेगान बदलत आसा. गंभीरान हें लागीच्यान पळयलां. भारतीय क्रिकेट मुखार व्हरपाक गंभीर योग्य व्यक्ती आसा हाची आपल्याक खात्री आसा असो विस्वास जय शाह हाणें गंभीराची प्रशिक्षकपदा खातीर नेमणुकीची घोशणा करतना उक्तायलो.
भारत हीच आपली वळख आसा. आपल्या देशाची सेवा करप ही आपले जिणेंतलो व्हड सन्मान आसा. भारतीय पंगडांत एका वेगळे भुमिकेंतल्यान जाल्लें पुनरागमन हें आपले खातीर सन्मानाचें आसा. भारतीय क्रिकेट पंगडाच्या भुजाचेर सदांच 140 कोटी भारताच्या लोकांचें सपन आसत. हें सपन पुर्ण करपाचो आपलो खर यत्न आसतलो अशी प्रतिक्रिया क्रिकेट पंगडाचो मुखेल प्रशिक्षकपदाचेर नेमणूक जाल्या उपरांत गंभीरान दिली.
गंभीराचो कार्यकाळ 3.5 वर्सांचो आसतलो. बीसीसीआयन मे म्हयन्यांत अर्ज मागयिल्ले. ते उपरांत दोगांची चांचणी घेतिल्ली. हातूंत गंभीरा खेरीत भारताच्या बायलांच्या क्रिकेट पंगडाचो आदलो प्रशिक्षक डब्ल्यू व्ही रमणाच्या नांवाचो आस्पाव आशिल्लो.
गंभीराक प्रशिक्षणाचो अणभव ना
42 वर्सां पिरायेच्या गंभीराक आंतरराष्ट्रीय वा देशांतर्गत प्रशिक्षण दिवपाचो अणभव ना. ताणें दोन आयपीएलांत दोन फ्रॅंचायजींची प्रशिक्षण स्टाफाची जापसालदारकी सांबाळ्ळ्या. 2022 आनी 2023चे आयपीएलांत तो लखनौ सुपर जायण्ट्साचो मार्गदर्शक आशिल्लो. 2024त तो कोलकाता नायट रायडर्सांत सामील जाल्लो. ताच्याच मार्गदर्शनाखाला लखनौ सुपर जायण्ट्सान दोन हंगामांनी प्ले ऑफांत सुवात मेळयिल्ली, जाल्यार कोलकाताक चॅम्पियन केलो.
खेळगडो म्हणून दोन वर्ल्ड कप आनी दोन आयपीएल जिखला
भारतान 2007त संवसारीक टी-20 आनी संवसारीक वन डे क्रिकेट सर्त जिखिल्ली. दोनूय खेपे भारताक वस्तादपण मेळोवन दिवपाक गंभीराचें म्हत्वाचें योगदान आशिल्लें. तशेंच ताच्याच फुडारपणाखाला कोलकाता नायट रायडर्सान 2012 आनी 2014त वस्तादपण जोडिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
