भांगरभूंय | प्रतिनिधी
पाकिस्ताना सारकें शेजारी राष्ट्र, शेजारधर्मा परस दुस्मान धर्माक पाळो दिवपाचेरूच चड भर दिवन ते प्रमाण वागत आसलें जाल्यार आपली शक्त दुस्मान पक्षाक कल्पनाय येवची ना इतली वाडोवप आनी खंयच्याय प्रसंगाक खंयच्याय वेळार तोंड दिवपा खातीर कायम सज्ज रावप ह्या एक कलमी कार्यावळीक चिकटून रावप कितलें गरजेचें आशिल्लें आनी झुजा विशींच्या धोरणांत हें सगलें कितले मेरेन फिट्ट बसतालें हें पाकिस्ताना कडेन तीन चार दीस जाल्ल्या झुजांत ठळकपणान पुराय संवसाराक कळून आयलें. फक्त तीन दिसांत पाकिस्तानान भारताची वाडिल्ली शक्त उक्त्या दोळ्यांनी पळयली. आतां ह्या तीन दिसांत पाकिस्तानान आपले दोळे तितले व्हगडायिल्ले नासले तरी खूब कितें व्हगडायलां. परतून भारता आड संवसाराक दाखोवपा खातीर काय जायना उबे रावपाचे म्हणत जाल्यार निदान पांच-स वर्सांचो काळ ते खातीर वचचो पडटलो. सद्या ‘आयसीयू’त पडून आशिल्ल्या पाकिस्तानी सरकारान परतूत संवसारा मुखार आपलो सुजिल्लो चेरो घेवन मुखार येवपाचें आसत जाल्यार ती तांची मर्जी. पूण तितलें धाडस करपाची ताकदूय आयज तांचे मदीं उरिल्ली ना. आतां भारताची वाडिल्ली शस्त्रसज्जता आनी मेळयिल्ली ताकद हाचे सगलें स्रय अर्थांतूच पाकिस्तानाक वता, हें कोणूच न्हयकाराचो प्रस्नूच उप्रासना. पाकिस्ताना सारको कट्टर दुस्मान देश आमचो शेजारी आशिल्ल्याचें म्हणटकच ते खातीर सद्दां दोळ्यांत तेल घालून सज्ज रावप आनी खंयच्याय खिणाक झुजाक तोंड दिवपाची तयारी दवरप हें आयलेंच.
पहलगामांतल्या आतंकवादी हल्ल्या उपरांत पाकिस्तानाक वठणीर हाडप ही गरज आशिल्लीच, पूण तेचबराबर त्याच देशान पोशिल्ल्या आतंकवादाचो चेरो कायमचो नश्ट करप हेंवूय तितलेंच म्हत्वाचें आशिल्लें. फक्त तीन साडेतीन दिसां भितरूच भारतीय लश्करान हें काम अशे तरेन केलें की अमेरिका, चीन, रशिया सारक्या व्हड राष्ट्रांक लागून भारताचो हेवो दिसचो. आतंकवादाचो अंत ही काळाची गरज आशिल्ली अशें सगलें जग अड्डी मारून सांगत आसलें तरी ते दिकेन सादें एक पावल लेगीत घालपाचें धाडस कोणेच करिनासतना भारतान तें करचें आनी तातूंत सुमार अर्दे आदीक जैत मेळोवचें ही निश्चीतपणान सादी घडणूक म्हणूंक येवची ना. पहलगामांतल्या आतंकवादी हल्ल्या उपरांत पंदरा वीस दिसां भितरूच आतंकवाद्यांचो बापूय आशिल्ल्या पाकिस्तानाक असो जबरदस्त धडो मेळ्ळो की अजून एक दोन वर्सा निदान आतंकवादाचे आघाडीचेर पाकिस्तानी लश्कर आनी प्रशासन कसलेच तरेचो फुडाकार घेवपाचें धाडस करीत अशें दिसना. पहलगामांत 22 एप्रीलाक ज्या 26 निश्पाप पर्यटकांची आतंकवाद्यांनी हत्या केली तांच्या कुटुंबाक न्याय दिवप हें आमचें पयलें कर्तव्य आशिल्ल्याचें मानूनच प्रधानमंत्री नरेंद्र मोदी हांणी हो निर्णय घेतला आनी आमच्या सैन्यान तो अचूकपणान अंमलातूय हाडलो. भारतीय सैन्या मुखार आमी सगलेंच व्हगडावन बसतले हाची जाण आयले उपरांतूच निर्लज्ज पाकिस्तानान भारता मुखार अशे तरेन दिमी मारली की संवसाराकूय ताची काळकूट येवची. अर्थांत तो मेरेन तांकां सगल्याच मळार खूब कितें व्हगडावचें पडलें आनी झुजपाची शक्त जाल्यार पुरायपणान सोंपिल्ली.
भारतीय लश्करान बदलो घेवपाचे भावनेंतल्यान हो खर हल्लो केलो, तातूंत पुरायपणान हुल्पल्ल्या पाकिस्तानाक अमेरिकेचे मजतीन झुजबंदी घडोवन हाडपाक येस आयिल्लें आसलें तरी तांची मुखा वेली वाटूय तितली सहज आनी सोंपी उरची ना हाची जाणूय तांकां जाल्या हें प्रकर्शान दिसून येता. पाकिस्तानांतलीं मुखेल हवाई तळां भारतीय हवाई हल्ल्यांत पुरायपणान मातयेभरवण जाल्ल्यान पाकिस्तानाक चड अशें कांयच करूंक आयलें ना हो एक म्हत्वाचो मुद्दो आसलो तरी ज्या अण्वस्त्राच्या आदाराचेर पाकिस्तानांतले सगलेच राजकी फुडारी व्हडा नेटान आड्डी मारताले तेच आण्वीक कमांड केंद्र भारताच्या ब्राह्मोस क्षेपणास्त्राच्या टप्प्यांत आयले उपरांत आतां आपली धडगत ना हें समजूनच पाकिस्तानान साश्टांग नमस्कार घालो आनी तांचो विनाश टळ्ळो. आतां खूबशा जाणांक दिसता की भारतीय सेना पाकिस्ताना भितर गेल्लीच जाल्यार पाकव्याप्त कश्मरांत भारतीय बावटो हुबोवपाची चलून आयिल्ली संद कित्याक सोडली. काँग्रेसी सयत खूबशे विरोधी पक्षूय भारतीय सेनेन केल्ले दोळे दिपकावपी कामगिरी कडेन आडनदर करीत सरकाराचेर राजकी उद्देशाक शाब्दीक फारपेट करूंक लागल्यात. आतां पहलगामांतल्या आतंकवादी हल्ल्याचो बदलो घेवप आनी आतंकवादाचो अंत घडोवन हाडप होच ‘सिंदूर ऑपरेशन’ हाचे फाटलो स्पश्ट उद्देश आसतना दुसरेच वटेन भरकटत वचप हाका जग वेगळोच रंग दितले आशिल्लें आनी ताचो गैरफायदो घेवपा खातीर चीना सारको देश टपून बशिल्लो आसतना आपले निर्धारीत उद्दिश्ट साध्य जाले उपरांत योग्य संद सादून झुजबंदी केल्ल्यान खूब कितें आमी मेळयलें अशेंच म्हणूंक येतलें.
भारतान पाकिस्ताना कडल्यान तीन चार दिसांच्या झुजांतूच जें कितें साध्य केलां ताचो विचार करीत जाल्यार संवसाराक हे कारवायेंतल्यान एक स्पश्ट संदेश मेळ्ळा हें मान्य करचेंच पडटलें. पाकिस्तान आतंकवादाचे थंयचे कारखाने बंद करपाचो नासत जाल्यार हे कारखाने कायमचे बंद करपाचें काम आतां भारतूच करतलो असो स्पश्ट संदेशूच संवसारीक समुदायाक आपले खर कृतीन दिला असो अर्थ काडूंक येतलो. पाकिस्तानांत भितर वचून पांच व्हड आतंकवाद्यां सयत तांच्या शंबरेक वांगड्यांक जिवेशी मारिल्ल्यान भारतान आपूण कितें करूंक शकता हेंच स्पश्टपणान संवसाराक दाखोवन दिलांच, पूण तेचबरोबर आतां एखादीय आतंकवादी घडणूक झुजा खातीर आमकां प्रवृत्त करतली अशी खर शिटकावणीय दिल्ल्यान पाकिस्तानी लश्कराक आतंकवाद्यांक दूद पियेवपाक दिवचे पयलीं शंबर फावटी विचार करचो पडटलो. पाकव्याप्त कश्मीरांतल्या आतंकवाद्यांचे णव मुखेल अड्डे मातयेभरवण करप हें दिसता तितलें सोंपें काम नाशिल्लें. अर्थांत थंयचे सगलेच अड्डे भारतीय लश्कराच्या रडाराचेर आशिल्ल्यान पाकिस्तानाक त्या आघाडीचेर सद्या नमतें घेवपा बगर आनीक कसलोच पर्याय नाशिल्लो. जम्मू आनी कश्मीरांत लोकजीण सुरळीत जावपा खातीर सगले यत्न केंद्रांतल्या सरकारा कडल्यान जायत आसतना आतंकवादी कारवायांनी ताका सुरूंग लावपाचो पाकिस्तानाचो प्रयास आतां थांबतलो अशी आस्त आसली तरी ताचेर भरवंसो दवरपूय घातक थारतलें. ‘सिंदूर ऑपरेशन’ ते खातीर सुरूच दवरचें पडटलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
