भांगरभूंय | प्रतिनिधी
पाकिस्तानाक 7 विकेटींनी हारोवन भारतान बायलांचे आशिया करंड टी-20 क्रिकेट सर्तीक जैतान सुरवात केली. अ गटांतले मॅचींत पाकिस्तानान टॉस जिखून पयलीं बॅटींग करपाचो निर्णय घेतलो. पूण, तांचो हो निर्णय भारताच्या बॉलरांनी चुकीचो थारायलो. तांचो डाव 19.2 ओव्हरींनी 108चेर सोंपलो. ते उपरांत भारतान 14.1 ओव्हरींनी 3 विकेटी व्हगडावन 109 धांवड्यो करून जैत जोडलें.
भारता वतीन दिप्ती शर्मान तीन विकेटी घेतल्यो. तिचे खेरीत रेणुका सिंग, श्रेयंका पाटील आनी पुजा वस्त्रकर हांकां दरेकी दोन विकेटी फावो जाल्यो.
मोखीचो फाटलाव करपी भारताक स्मृती मंधाना आनी शेफाली वर्मा हांणी जबरदस्त बॅटींग केली. तांणी पयले विकेटी खातीर 85 धांवड्यांची भागिदारी केली. तिणें 31 बॉलांनी 45 धांवड्यो केल्यो. स्मृती बाद जाल्या उपरांत शेफालीन दयालन हेमलता वांगडा मेळून डाव मुखार व्हेलो. पूण, 100च्या स्कोराचेर शेफाली बाद जाली. तिणें 29 बॉलांनी 40 धांवड्यो केल्यो. ते उपरांत दयालन लेगीत रोखडीच तंबूंत परतली. पूण, ते मेरेन भारत मोखीच्या सामको लागीं पाविल्लो.
मजगतीं, भारताचे पुजा वस्रकरान उत्कृश्ट बॉलींग केली. तिणें आपले स्पेलाचे पयले ओव्हरींत गुल फिरोजाक बाद केली आनी उपरांत आपले दुसरे ओव्हरींत मुनिबा अलीक बाद केली.
पुजान शॉर्ट पीच बॉलींग करून पाकिस्तानाच्या बॅटरांक नाकापुरो केलें. पुजा खेरीत दिप्तीन लेगीत बरी बॉलींग घाली. तिणें 20 धांवड्यो दिवन 3 विकेटी घेतल्यो. तिणें प्रतिस्पर्धी पंगडाक मदल्या ओव्हरींनी बॅकफुटाचेर दवरिल्लो.
मॅचीचे सुरवातीच्या स ओव्हरींनीच भारतान आपलो शेक दवरिल्लो. पावर प्लेंत पाकिस्तानाक फकत 37 धांवड्यो करप शक्य जाल्यो. हांगाच्यान भारतान आपलो शेक दवरपाक सुरवात केल्ली. पाकिस्तानाक मॅचींत प्रतीहल्लो करपाक एकदाय जमलो ना.
मजगतीं, उक्तावणाचे पयले मॅचींत नेपाल पंगडान संयुक्त अरब अमिराताक स विकेटींनी हारयलो. आशिया करंड क्रिकेट सर्तींत नेपालान पयलें जैत जोडलें. हाचे पयलीं नेपालान आठ आशियायी करंड सर्तींत वांटो घेतिल्लो. पूण, ताका सगल्या मॅचींनी हार घेवची पडिल्ली.
दाम्बुलाच्या मैदानाचेर जाल्ले मॅचींत नेपालान टॉस जिखून युएईक पयलीं बॅटींग करपाचें आमंत्रण दिलें. युएईन 20 ओव्हरींनी 8 विकेटी व्हगडावन 115 धांवड्यो केल्यो. ते उपरांत नेपालान 16.1 ओव्हरींनी 4 विकेटी व्हगडावन 118 धांवड्यो केल्यो आनी 6 विकेटींनी जैत जोडलें. नेपालाची समझना खडकान नाबाद 72 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
