भारताचें सोंपें जैत

भांगरभूंय | प्रतिनिधी

भारतान पयले मॅचींत ऑस्ट्रेलिया पंगडाक 5 विकेटींनी हारोवन तीन मॅचींचे वन डे माळेंत 1-0 आघाडी घेतली. ऑस्ट्रेलियेन सगल्यो विकेटी वगडावन 276 धांवड्यो केल्यो. भारतान 48.4 ओव्हरींनी 5 विकेटी वगडावन 281 धांवड्यो करून जैत जोडलें.

मोहम्मद शमीन 51 धांवड्यांनी 5 विकेटी घेतल्यो. ते उपरांत शुभमन गिल आनी ऋतुराज गायकवाड हे जोडयेन वयले विकेटी खातीर 142 धांवड्यांची भागिदारी करून भारताच्या जैताचें मुळावण घालें. ऑस्ट्रेलियेच्या बॉलरांनी मदल्या ओव्हरींनी पुनरागमन करपाचो यत्न केलो. पूण, भारताच्या बॅट्समनांनी तांचो यत्न फुकट घालयलो. सुर्यकुमार यादवान पंगड वेवस्थापनाचो विस्वास योग्य थारायलो जाल्यार लोकेश राहुलान मुखेल्याक सोबा सारको खेळ केलो. 1996 उपरांत भारतान पयलेच खेपे मोहालींत ऑस्ट्रेलिया पंगडाक वन डे मॅचींत हारयलो.

ऋतुराज आनी शुभमन हांणी पयले विकेटी खातीर 142 धांवड्यांची भागिदारी केली. ऑस्ट्रेलिया आडचे वन डे मॅचींतली ही भारता वतीन 17वी ओपनरांनी केल्ली शेंकड्याची भागिदारी थारली. भारतान हे भागिदारीच्या नेटार इंग्लंडाक फाटीं घालो. इंग्लंडान 16 खेपे  ऑस्ट्रेलिये आड हो पराक्रम केल्लो. ही जोडी अॅडम झम्पान फोटली. ताणें गायकवाडाक एलबीडब्ल्यू बाद केलो. ताणें 77 बॉलांनी 10 चवक्यांचे मजतीन 71 धांवड्यो केल्यो. शुभमन लेगीत झम्पाच्या बॉलाचेर बोल्ड जालो. शुभमनान 63 बॉलांनी स चवके आनी दोन सक्यांचे मजतीन 74 धांवड्यो केल्यो. ते उपरांत इशान किशन आनी राहुल हाणें डाव सांबाळ्ळो. पूण, पॅट कमिन्सान ही जोडी फोडली. इशान 18 धांवड्यो करून तंबूंत परतलो.

लोकेश आनी सुर्यकुमार यादव हांणी संयमान बॅटींग केली. भारताक जैता खातीर 60 बॉलांनी 54 धांवड्यांची गरज आशिल्ली. मुखेल प्रशिक्षक राहुल द्रविडान सुर्याचेर दाखयिल्लो विस्वास खरो थारलो. सुर्यान 47 बॉलांनी वन डेतलो तिसरो अर्द शेंकडो पुर्ण केलो. ताणें 49 बॉलांनी 1 सक्याचे मजतीन 50 धांवड्यो करून कॅच बाद जालो. राहुलान नाबाद 58 धांवड्यांची खेळी करून भारताचें जैत निश्चीत केलें.

ते पयलीं डॅव्हिड वॉर्नर, स्टिव्ह स्मिथ, मार्नस लाबशेन, जोस इंग्लीश हांचे बॅटिंगे नेटार ऑस्ट्रेलिया 300 परस चड धांवड्यो करतलो अशें दिशिल्लें. पूण, शमीन पयलेच ओव्हरींत धपको दिलो. उपरांत स्मिथ (41) आनी वॉर्नर (52) हाणें 106 बॉलांनी 94 धांवड्यांची भागिदारी केली. लाबशेनान (39) आनी कॅमरून ग्रीन (31) हांणी 45 धांवड्यांची भागिदारी केली. इंग्लीश (45) आनी ग्रीन हांचे मदलो ताळमेळ चुकिल्ल्यान भारताक एक विकेट मेळ्ळी. इंग्लीश आनी मार्कस स्टोयनीस (29) हाणें बरो खेळ केलो. पॅट कमिन्सान नाबाद 21 धांवड्यो केल्यो.