भांगरभूंय | प्रतिनिधी
सध्याचो वस्ताद भारतान दादल्यांच्या आशियायी चॅम्पियन्स हॉकी सर्तींतले दुसरे मॅचींत जपान पंगडाक 5-1 अशा व्हडा फरकान हारयलो. चीनाच्या हुलूनबूर शारांत सर्तीचें आयोजन केलां. भारतान आपले पयले मॅचींत येजमान चीन पंगडाक 3-0 असो हारयिल्लो.
सुखजीत सिंग आनी अभिषेक हांणी पयल्या क्वॉर्टरांत गोल केल्ल्यान भारतान रोखडोच वेग धरलो. तांच्या जलद, अचूक हल्ल्या मुखार जपानाचे डिफॅण्डर तग धरपाक धडपडटना दिसले. भारतान पयल्या क्वॉर्टरांत 2-0 अशी आघाडी घेतिल्ली. दुसऱ्या क्वॉर्टरांत हरमनप्रीत सिंगान पॅनल्टी कॉर्नर घेतलो आनी संजयान अचूक ड्रॅग फ्लिकाचेर गोल केलो. मध्यांतरा मेरेन भारत 3-0 असो मुखार आशिल्लो.
जपानान तिसऱ्या क्वॉर्टरांत चड लवचिकताय दाखयली. मात्सुमोटोन भारताच्या बचावांत आशिल्ल्या त्रुटींचो फायदो घेत गोल केलो. एक गोल पडल्या उपरांत भारतान आपल्याक रोखडोच सांबाळून घेतलो. ताणें बॉलाचेर आपलो चड वगत ताबो दवरलो तशेंच जपानाक आनीक येस मेळूंक दिले ना.
चवथ्या क्वॉर्टरांत भारतान हाय प्रेसींग खेळ केलो. मॅच सोंपपाक स मिनटां बाकी आसतना राशीदच्या योग्य पासाचेर जरमनप्रीत सिंगान गोल केलो. ते उपरांत राजकुमार सिंगाच्या पासाचेर सुखजीतान मॅचींतलो आपलो दुसरो आनी भारताचो पांचवो गोल केलो.
भारत आपली फुडली मॅच 11 सप्टेंबराक दक्षीण कोरिया आड खेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
