भांगरभूंय | प्रतिनिधी
भारतान संवसारीक टी-20 सर्तीच्या सुपर 12त सेगीत दुसऱ्या जैताची नोंद करून सेमी फायनलींतलो आपलो दावो आनीक घटमूट केलो. पाकिस्तानाक पयले मॅचींत 4 विकेटींनी हारयल्या उपरांत काल नॅदरलॅण्डा आड 56 धांवड्यांनी जैत जोडलें.
भारतान पयलीं बॅटींग करतना निर्धारीत 20 ओव्हरींनी 2 विकेटी वगडावन 179 धांवड्यो केल्यो. ते उपरांत प्रत्युत्तर दिवपी नॅदरलॅण्डाचो डाव 20 ओव्हरींनी 9 विकेटी घेवन 123 धांवड्यांचेर आडायलो.
मोखीचो फाटलाव करपाक मैदानांत देंवपी नॅदरलॅण्ड सुरवाती सावन चेपणाखाला दिसलो. तिसरे ओव्हरींत भुवनेश्वर कुमारान पयलो धपको दितना विक्रमजीत सिंगाक बाद केलो. ते उपरांत अक्षर पटेलान दोन धपके दितना मॅक्स ओ डावडाक (16) बोल्ड केलो आनी बास डी लीड (16) हाका हार्दिक पांड्या वरवीं कॅच बाद केलो.
उपरांत आर आश्विनान सकयले सुवाते वयल्या बॅट्समनांचेर आपलो शेक दवरलो. ताणें कोलीन एकेरमॅन (17) आनी टॉम कूपर (17) हाका तंबूंत धाडलो. एकेरमॅनाची कॅच अक्षर पटेलान आनी कूपराची कॅच बदली खेळगडो दीपक हुड्डान धरली.
ते पयलीं सुर्यकुमार यादव, विराट कोहली आनी मुखेली रोहित शर्मा हांच्या अर्द शेंकड्यां नेटार भारतान 179 धांवड्यो केल्यो. रोहितान 39 बॉलांनी 53 धांवड्यांची खेळी करून भारताची दिका निश्चीत केली. जाल्यार पाकिस्ताना आड अशक्य दिसपी जैत मेळोवन दिवपी कोहलीन 44 बॉलांनी नाबाद 62 धांवड्यो केल्यो.
कोहलीन दुसरे विकेटी खातीर रोहिता वांगडा 73 धांवड्यांची आनी तिसरे विकेटी खातीर सुर्यकुमारा वांगडा नाबाद 95 धांवड्यांची भागिदारी केली. लोकेश राहुल सेगीत दुसरे मॅचींत अपेशी थारलो. 12 बॉलांनी 9 धांवड्यो करून तो बाद जालो.
नॅदरलॅण्डान पावर प्लेंत बरें प्रदर्शन केलें, ताका लागून भारताक एक विकेट वगडावन फक्त 32 धांवड्यो करप शक्य जाल्यो. 10 ओव्हरी उपरांत भारताचो स्कोर 1 बाद 67 आशिल्लो. ते उपरांत सुर्यकुमारान आक्रमक बॅटींग करपाक सुरवात केली. फुडल्या 10 ओव्हरींनी भारतान 112 धांवड्यो केल्यो.
सुर्यकुमारान अॅक्स्ट्रा कव्हर आनी डीप फायन लेगांत कांय आकर्शक शॉर्ट्स मारले. ताणें आपल्या डावांत सात चवके आनी एक सको मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
