भांगरभूंय | प्रतिनिधी
भारताच्या बायलांच्या हॉकी पंगडाचें पॅरीस ऑलिम्पिकांत खेळपाचें सपन भंगलें. टोकियो ऑलिम्पिकांत पयल्या चारांनी सुवात मेळोवपी भारताचो पंगड ऑलिम्पीक कोटा मेळोवपाक अपेशी थारलो.
काल रांचीच्या स्टेडियमाचेर ऑलिम्पीक क्वॉलिफायल सर्तीचे कांश्या पदका खातीर जाल्ले मॅचींत ताका जपान पंगडा कडल्यान 1-0 अशी निसट्टी हार घेवची पडली. जपाना वतीन एकोडो आनी म्हत्वाचो गोल काना उरातान मॅचीच्या सव्या मिनटाक पॅनल्टी कॉर्नराचेर केलो. ते उपरांत भारतान बरोबरी करपाचो खूब यत्न केलो. पूण, ताका अखेर मेरेन येस मेळूंक ना.
हे सर्तींतल्या पयल्या तीन पंगडांक पॅरीस ऑलिम्पिकाची तिकेट फावो जाली. अमेरिका आनी जर्मनी ह्या पंगडांनी फायनलींत सुवात मेळयिल्ल्यान तांची पयलीच तिकेट निश्चीत जाल्ली, जाल्यार जपानान भारताक हारोवन तिसरी सुवात मेळोवन ऑलिम्पीक पात्रताय मेळयली.
एक दीस पयलीं भारताक सेमी फायनलींत जर्मनी कडल्यान सडन डॅथांत हार घेवची पडिल्ली. निर्धारीत वेळाच्या खेळांत दोनूय पंगड 2-2 अशे बरोबरींत उरिल्ल्यान निकाल लावपाक पॅनल्टी शुटआवटाचो आदार घेतलो. पॅनल्टी शुटआवटांत लेगीत दोनूय पंगड 3-3 अशे बरोबरींत उरिल्ल्यान अखेरेक निकाल लावपाक सडन डॅथाचो आदार घेवचो पडिल्लो. हातूंत जर्मनीन जैत जोडून भारताचें फायनलींत पावपाचें सपन भंगयिल्लें. ते उपरांत आतां पात्रताय मेळोवपाचें लेगीत सपन भंगलें.
बायलांच्या गटांतल्यान ऑस्ट्रेलिया, अर्जेंटिना, नॅदरलॅण्ड, दक्षीण आफ्रिका, चीन, जर्मनी, अमेरिका आनी जपान ह्या देशांनी आपलो प्रवेश निश्चीत केला. आतां फकत एकूच क्वॉलिफायर-2 बाकी आसा. हातूंतल्यान तीन पंगड निश्चीत जातले.
मजगतीं, भारताच्या दादल्यांच्या पंगडान पॅरीस ऑलिम्पीक सर्तीची पात्रताय आदींच मेळयल्या. भारतान आशियायी खेळां सर्त 2022चें भांगरा पदक जिखून पॅरीस ऑलिम्पिकाची पात्रताय मेळयिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
