भारताचें वस्तादपण निश्चीत

भांगरभूंय | प्रतिनिधी

बायलांचे संवसारीक बुद्दीबळ सर्तीचें वस्तादपण भारताक निश्चीत जालां. फायनल जावचे पयलींच एका देशाचें वस्तादपण मेळप निश्चीत जावप हे सर्तीच्या इतिहासांत पयलेच खेपे घडलां. कारण काल ग्रॅण्डमास्टर कोनेरू हम्पीन कारकिर्दींतले सर्वोत्कृश्ट खेळांपैकी एक प्रदर्शन करतना चीनाची संवसारीक क्रमवारींत दुसरे सुवातेर आशिल्ले लेई टिंगजी हिका टायब्रेकरांत 4-2 अशा फरकांनी हारोवन फायनलींत सुवात मेळयली. कोनेरू हम्पी फायनलींत आपल्याच देशाचे 19 वर्सां पिरायेचे दिव्या देशमुख हिच्या आड खेळटली.

दिव्यान काल जाल्ले क्लासिकल मॅचींत चीनाची आदली संवसारीक वस्ताद टॅन झोंगयी हिका 1.5-0.5 अशा फरकांनी हारोवन फायनलींतली सुवात निश्चीत केल्ली.

कोनेरू हम्पी आनी लेई टिंगजी हांचे मदीं पयलीं 15+10 मिनटांची रॅपीड टायब्रेकर मॅची वरवीं टायब्रेकराक सुरवात जाली. दोनूय डावांनी हम्पीन उत्कृश्ट रितीन बचाव केलो आनी डाव बादाबाद दवरले. दोनूय खेपे बरे स्थितींत आसून लेगीत लेईक हम्पीचो बचाव भेदपाक जमलो ना. अशे तरेन स्कोर 1-1 असो जालो.

दुसऱ्या टायब्रेकरांत 10+5 अशो दोन मॅची जाल्यो. हम्पीन पयले मॅचींत बरे स्थितींत आशिल्ली. पूण एक व्हड चूक केली आनी मॅच व्हगडायली. ताका लागून ती 1-2 अशी फाटीं पडली. ते उपरांत फुडले मॅचींत धव्या घुलांनी खेळटना जबरदस्त पुनरागमन केलें आनी जैत जोडलें. ह्या जैताक लागून हम्पीक 2-2 अशी बरोबरी करपाक शक्य जालें. ते उपरांत 5+3 मिनटाच्या तिसऱ्या टायब्रेकरांत हम्पीन उत्कृश्ट खेळ केलो. पयलीं धव्या घुलांनी खेळटना जैत जोडलें आनी उपरांत काळ्या घुलांनी खेळटना दुसरें जैत जोडलें. अशे तरेन हम्पीन 4-2 फरकान जैत जोडून फायनलींत सुवात मेळयली.

हम्पी सध्याची संवसारीक रॅपीड वस्ताद हम्पी फिडे कॅण्डिडेट 2026त सुवात मेळोवपी चवथी आनी भारताची दुसरी खेळगडी थारली. कॅण्डिडेट सर्ती खातीर हम्पी खेरीत दिव्या देशमूख, चीनाची ज्यू जिनर आनी रशियेचे अालेक्सांदरा गोरयाचकिना हिणे आपली सुवात निश्चीत केल्या.

ते आदीं दिव्यान फायनलींतली सुवात मेळोवन इतिहास घडयलो. संवसारीक बुद्दीबळ सर्तीचे फायनलींत सुवात मेळोवपी ती भारताची पयली खेळगडी थारली.