भांगरभूंय | प्रतिनिधी
चीनाच्या होंगझोउ शारांत सोंपिल्ले 19वे आशियायी खेळांत भारतान दोळे दिपकावपी प्रदर्शन केलें. ताणें 107 पदकां सयत आशियायी खेळांचो समारोप केलो. भारतान काल 6 भांगरा पदकां, चार रुप्या पदकां आनी दोन कांश्या पदकां जिखलीं.
तिरंदाजींत दोन भांगरा पदकां, एक रुपें आनी एक कांशें जिखलें, क्रिकेटींत एक भांगरा पदक जिखलें, कबड्डींत दोन आनी बॅडमिंटनांत एक भांगरा फावो जालें. बायलांच्या हॉकी पंगडाक कांश्या पदक फावो जालें. रेसलर दीपक पुनियाक रुप्या पदक आनी बुद्दीबळांत दादल्यांच्या आनी बायलांच्या पंगाक एकेक रुप्या पदक फावो जालें.
सात्विक-चिरागाचें बॅडमिंटनांत इतिहासीक प्रदर्शन
भारताचे सात्विक साईराज आनी चिराग शेट्टी हे जोडयेन दादल्यांच्या दोट्टी गटांत कोरियाचे जोडयेक 21-18 आनी 21-16 अशा फरकांनी हारोवन भांगरा पदक जिखलें. विशेश गजाल म्हणल्यार आशियायी खेळांत बॅडमिंटनांत भारतान मेळयिल्लें हें पयलें भांगरा पदक थारलें.
भारताची जोडी चोई आनी किम वोनहो हे जोडये आड पयले गेमींत फाटीं आशिल्ली. पूण, उपरांत उत्कृश्ट रितीन पुनरागमन केलें. तांणी पयली गेम 21-18 फरकान जिखली. ते उपरांत दुसरे गेमींत कोरियाचे जोडयेचें आव्हान 21-16 फरकान सोंपोवन भांगरा पदक जिखलें.
कबड्डींत दोनूय पंगडांक भांगर
भारताच्या बायलांच्या आनी दादल्यांच्या कबड्डी पंगडान भांगरा पदक जिखलें. बायलांच्या पंगडान उमळशीक वाडोवपी फायनलींत तायवान पंगडाक 26-25 अशा फरकान हारयलो. मध्यांतरा मेरेन भारत 14-9 असो बरे स्थितींत आशिल्लो. पूण, दुसऱ्या अर्दांत तायवानान जबरदस्त प्रदर्शन केलें. पूण, अखेरेक भारतान जैत जोडपाक येस मेळयलें.
दादल्यांच्या गटांतली फायनल वादग्रस्त थारली. भारतान इराणाक हारोवन भांगरा पदक जिखून फाटले आशियायी खेळांत इराणा कडल्यान मेळिल्ले हारीचो बदलो घेतलो. पूण, मॅचींत वाद लेगीत जालो. पंचाच्या एका निर्णयाचेर इराणाच्या खेळगड्यांनी तिडक उक्तावन मैदान सोडलें. दोनूय पंगडांचें 28-28 अशे समान जाल्ले. अखेरचें मिनट बाकी आशिल्लें. त्या वेळार भारताचो मुखेली पवन सेहरावत हाणें चढाई केली. पूण, ताका कोणाकूच टच करपाक जमलें ना.पूण, ह्या वेळार ताचो पांय लॉबींत गेलो. ताच्या फाटोफाट इराणाचे तीन डिफॅण्डर लेगीत ताका धुकलपाक लॉबींत आयले. ताका लागून पंचान दोनूय पंगडांक एकेक गूण दिलो आनी हांगाच्यान वादाक सुरवात जाली. बायल पंगडाची खेळगडी पुष्पा राणा हिणें आड्डून इराणाचे चार खेळगडे लॉबींत आयिल्लें अशें सांगलें. ताका लागून भारताक चार गूण मेळपाक जाय. ते उपरांत पंचांनी रिप्ले पळयलें. हातूंत पुष्पाचें म्हणणें खरें थारलें. पंचान आपलो निर्णय बदलून भारताक चार गूण दिले. हाचेर इराणाचे खेळगडे बेजारले. ताच्या खेळगड्यांनी भारताच्या खेळगड्यां वांगडा वाद करपाक सुरवात केली. ह्या वादाक लागून खेळ एक वर मेरेन थांबोवचो पडलो. ते उपरांत साबार रिल्पे पळयल्या उपरांत पंच आनी टॅक्नीकल पंगडान भारताक तीन आनी इराणाक एक गूण दिलो. भारत ह्या गुणां उपरांत 31-29 असो मुखार पावलो आनी दोन गूण घेवन भारतान भांगरा पदक जिखलें.
ज्योती, ओजस हांची भांगरा पदकांची हॅट्रीक
भारताची अणभवी कम्पावण्ड तिरंदाज खेळगडी ज्योती सुरेखा वेन्नम हिणें भांगरा पदक जिखलें. ज्योतीन कोरियाची सो चाएनोव हिका 149-145 फरकान हारयली. ज्योतीचें हें तिसरें भांगरा पदक थारलें. मिश्र गटांत आनी बायलांच्या सांघीक गटांत तिणें भांगर जिखिल्लें. अदिती स्वामीक कांश्या पदक फावो जालें. तिणें इंडोनेशियाचे रातिह जिलिजाती हिका 146-140 अशा फरकान हारयली.
मजगतीं, ओजस देवतळेन दादल्यांच्या वैयक्तीक कम्पावण्ड प्रकारांत भांगरा पदक जिखून भांगरा पदकांची हॅट्रीक केली. ताणें मिश्र कम्पावण्डांत आनी दादल्यांच्या कम्पावण्डांत भांगरा पदक जिखिल्लें.
दादल्यांच्या क्रिकेट पंगडाक भांगर
भारताच्या दादल्यांच्या क्रिकेट पंगडाक भांगरा पदक फावो जालें. अफगाणिस्ताना आडची फायनल पावसाक लागून रद्द करची पडली. भारतान टॉस जिखून पयलीं बॉलींग करपाचो निर्णय घेतलो. पूण, पावस लागून खेळ थांबोवचो पडलो त्या वेळार अफगाणिस्तानान 18.2 ओव्हरींनी 5 विकेटी वगडावन 112 धांवड्यो केल्ल्यो. ते उपरांत मॅच जाली ना. ताका लागून आयसीसीच्या टी-20 क्रमवारीच्या आदाराचेर भारताक जैतिवंत घोशीत केलो. हे क्रमवारींत भारत पयले सुवातेर आसा जाल्यार अफगाणिस्तान धावे सुवातेर.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
