भांगरभूंय | प्रतिनिधी
संवसारीक टी-20 क्रिकेट सर्तीचे सेमी फायनली मेरेन मजल मारपी भारत आतां न्युझिलॅण्डा आड तीन टी-20 मॅचींची माळ खेळपाक मैदानांत देंवतलो. हे माळे खातीर निवड समितीन कांय सिनीयर खेळगड्यांक विसव दिवपाचो निर्णय घेतला. ताका लागून मुखेलपद हार्दिक पांड्या सांबाळटलो. माळेंतली पयली मॅच 18 नोव्हेंबराक वॅलिंग्टनांत जातली. दोनूय पंगडांच्या इतिहासाचेर नदर मारली जाल्यार भारताक जैताची चड संद आसा.
भारताचो पंगड न्युझिलॅण्डा आड फाटल्यो आठ मॅची जिखला. जानेवारी 2020त विराट कोहलीच्या फुडारपणाखाला भारतान न्युझिलॅण्डाची भोंवडी केल्ली. ते भोंवडेर भारतान पांच मॅची खेळिल्ल्यो आनी भारतान इतिहासीक प्रदर्शन करतना पांचूय मॅची जिखिल्ल्यो. न्युझिलॅण्डाचे भुंयेंत एकूय मॅच वगडायनासतना माळ जिखपी कोहली भारताचो पयलो मुखेली थारिल्लो.
ते उपरांत जानेवारी 2021त टी-20 माळ खेळपाक न्युझिलॅण्डाचो पंगड भारत भोंवडेर आयिल्लो. त्या वेळार भारताचो मुखेली रोहित शर्मा आशिल्लो. ताच्या फुडारपणाखाला भारतान तीन मॅचींची माळ 3-0 फरकान जिखिल्ली. अशे तरेन भारतान न्युझिलॅण्डा आड सेगीत आठ मॅची जिखल्यात. हो जैताचो क्रम हार्दिक पांड्या कायम दवरपाक येसस्वी थारता काय ना हें पळोवपा सारकें आसा.
दोनूय पंगडां मदीं आतां मेरेन जाल्ल्या सगल्या टी-20 मॅचींचेर नदर मारली जाल्यारूच भारताचेंच दालें जड दिसता. दोनूय पंगडां मदीं आतां मेरेन 20 मॅची जाल्यात. हातूंतल्यो 11 मॅची भारतान जिखल्यात, जाल्यार 9 मॅची जिखपाक न्युझिलॅण्डाक येस आयलां. दोनूय पंगडां मदीं पयली टी-20 मॅच 16 सप्टेंबर 2017त जाल्ली. ते मॅचींत भारताक हार घेवची पडिल्ली. ते उपरांत भारत चार मॅचींनी हारलो. अखेरेक 4 नोव्हेंबर 2017त कोहलीच्या फुडारपणाखाला भारतान न्युझिलॅण्डा आड पयलें जैत जोडलें. ते उपरांत भारतान न्युझिलॅण्डाचेर आपलो शेक कायम दवरला. 2017 उपरांत तांचे मदीं 14 मॅची जाल्यात आनी तातूंतल्यो 10 मॅची भारतान जिखल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
