भांगरभूंय | प्रतिनिधी
संयुक्त राष्ट्रांच्या स मदल्या पांच थारावां वटेन भारत
न्यूयाॅर्क, खबरां संस्था : संयुक्त राष्ट्र महासभेंत ‘इस्रायल व्याप्त पॅलेस्टायनां’तल्या कारवायांचो खर निशेध करपी थारावाचे वटेन भारतान मतदान केलां. आयतारा महासभेंत वट्ट स थाराव मांडले. तातूंतल्या पांच थारावांचे वटेन भारतान मतदान केलें. तर एका थारावाचेर भारत तटस्थ रावलो. संयुक्त राष्ट्र महासभेंत ‘स्पेशल पॉलिटिकल अँड डी- कॉलनायेशन कमिटी’न ९ नोव्हेंबराक वांगडी देशांचीं मतां नोंद करून पॅलेस्टायन प्रस्नासयत अस्तंत आशियेतले परिस्थिती कडेन संबंदीत स थारावांचो आराखडो मंजूर केल्लो.
‘पूर्व जेरुसलेम सयत व्याप्त पॅलेस्टिनी वाठारांत आनी सीरियांतल्या इस्रायल व्याप्त गोलन वाठारांत इस्रायली वसणूक’ माथाळ्याच्या ह्या थारावाचे वटेन १४५, विरोधांत सात आनी १८ तटस्थ देश अशा मतांनी समितीन हो थाराव मानून घेतलो. कॅनडा, हंगेरी, इस्रायल, मार्शल जुंवीं, मायक्रोनेशिया संघराज्य, नाऊरू आनी अमेरिका हांणी थारावाच्या विरोधांत मतदान केलें. थारावाचे वटेन मतदान करपी १४५ देशां मदीं भारता सयत बांगलादेश, भूतान, चीन, फ्रान्स, जपान, मलेशिया, मालदीव, रशिया, दक्षीण आफ्रिका, श्रीलंका आनी ब्रिटनाचो आसपाव आसा.
ह्या थारावांतल्या मसुद्या प्रमाण, पूर्व जेरुसलेम सयत ताब्यांत घेतिल्ल्या पॅलेस्टिनी वाठारांत आनी ताब्यांत आशिल्ल्या सीरियन गोलन वाठारांत इस्रायलच्यो वसणुकवादी कारवायो, जमीन बळकावप, थळाव्या लोकांच्या दिसपट्ट्या वेव्हारांत आडमेळीं हाडप, नागरिकांचें फोर्सान हस्तांतर आनी प्रत्यक्षांत वा कायदो करून जमीन आपल्या देशाक जोडून घेवप हांचो निशेध करपी हे थाराव आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
