भांगरभूंय | प्रतिनिधी
भारताच्या बायलांच्या क्रिकेट पंगडान हांगाच्या डी व्हाय पाटील स्टेडियमाचेर चालू आशिल्ली इंग्लंडाची एकोडी टॅस्ट मॅच 347 धांवड्यांनी जिखली. बायलांच्या टॅस्ट क्रिकेटीच्या इतिहासांत धांवड्यांच्या फरकान खंयच्याय पंगडान मेळयिल्लें हें व्हड जैत आसा.
हाचे पयलीं म्हणल्यार 1998त श्रीलंकेच्या बायलांच्या पंगडान पाकिस्ताना आड 309 धांवड्यांनी जैत जोडिल्लें. जाल्यार न्युझिलॅण्डान 1972त दक्षीण आफ्रिका पंगडाक 188 धांवड्यांनी हारयिल्लो.
दीप्ती शर्मान अश्टतासांचो खेळ केलो. दीप्तीचे स्पिन बॉलिंगेच्या जाळांत इंग्लंडाचे बॅटर सहज रितीन आडखळ गेले.
भारताच्या बायलांच्या पंगडान पयले खेपे घरच्या मैदानाचेर खेळटना इंग्लंडा हारयलो. तशेंच इंग्लंडा आड मेळयिल्लें हें वट्ट तिसरें जैत आसा. हाचे पयलीं 2006त टॉण्टनांत आनी 2014त वॉर्मस्ले हांगा भारतान इंग्लंडाक हारयिल्लो.
भारताचो बायलांचो पंगड 9 वर्सांनी घरच्या मैदानाचेर टॅस्ट खेळपाक मैदानांत देंविल्लो. हाचे पयलीं 2014त भारताचो बायलांचो पंगड दक्षीण आफ्रिका पंगडा आड टॅस्ट खेळिल्लो. पूण, इंग्लंडा आडचे टॅस्टी उपरांत भारताच्या पंगडाक फुडली टॅस्ट खेळपाक चड वेळ वाट पळोवची पडची ना. पांच दिसांनी म्हणल्यार 21 डिसेंबरा सावन भारताचो पंगड ऑस्ट्रेलिये आड हांगाच्या वानखेडे स्टेडियमाचेर टॅस्ट मॅच खेळटलो. ते उपरांत दोनूय पंगडां मदीं तीन वन डे आनी तीन टी-20 मॅचींची माळ जातली.
मजगतीं, भारतान टॉस जिखून पयलीं बॅटींग करपाचो निर्णय घेतलो आनी पयल्या डावांत 428 धांवड्यो केल्ल्यो. नवोदीत शुभा साथिसान 69 धांवड्यांची खेळी केल्ली. जाल्यार दीप्तीन 67 धांवड्यांचें योगदान दिलें. विकेटकीपर यास्तिका भाटियान 66 धांवड्यांची खेळी केल्ली. मुखेली हरमनप्रीत कौरान 49 धांवड्यांचें योगदान दिल्लें. जेमिमाह रॉड्रिग्सान 99 बॉलांनी 67 धांवड्यो केल्ल्यो.
उपरांत इंग्लंडाचो पयलो डाव फकत 136 धांवड्यांचेर गुठलायलो. नॅट शिवरान सगल्यांत चड 59 धांवड्यो केल्ल्यो. भारता वतीन दीप्तीन पयल्या डावांत 5 विकेटी घेतिल्ल्यो. ते उपरांत भारतान आपलो दुसरो डाव 6 बाद 186 धांवड्यांचेर घोशीत केलो. पयल्या डावांत भारता कडेन 292 धांवड्यांची आघाडी आशिल्ली. ताका लागून इंग्लंडाक जैता खातीर 479 धांवड्यांची मोख मेळ्ळी. पूण, इंग्लंडाचो दुसरो डाव 131चेर सोंपलो. भारता वतीन दुसऱ्या डावांत दीप्ती शर्मान चार आनी पुजा वस्त्राकरान तीन विकेटी घेतल्यो. राजेश्वरी गायकवाडान दोन जाल्यार रेणुका सिंग ठाकूरान एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
