भांगरभूंय | प्रतिनिधी
पॅरीस ऑलिम्पिकांत कांश्या पदक जिखपी भारताच्या दादल्यांच्या हॉकी पंगडान आशियायी चॅम्पियन्स ट्रॉफींत आपल्या जैताची धांव कायम राखली. सध्याचो वस्ताद भारतान पाकिस्तानाक 2-1 फरकान हारयलो. मॅच चीनाच्या हुलुनबुईरच्या मोकी प्रशिक्षण तळाचेर जाली. भारतान हे सर्तींत सेगीत पांचव्या जैताची नोंद केली. भारता वतीन दोनूय गोल मुखेली हरमनप्रीत सिंगान केले. पाकिस्ताना वतीन अहमद नदीमान एक गोल केलो.
भारत पांच मॅची जिखून पयले सुवातेर आसा. जाल्यार पाकिस्तान पांचांतल्यो दोन मॅची जिखून दुसरे सुवातेर आसा. दोनूय पंगडांनी पयलींच सेमी फायनलींतली आपली सुवात निश्चीत केल्या.
भारतान आपले पयले मॅचींत चीन पंगडाक 3-0 फरकांनी, दुसरे मॅचींत जपानाक 5-1, मलेशियाक 8-1 आनी दक्षीण कोरिया पंगडाक 3-1 अशा फरकांनी हारयला.
पयल्या क्वॉर्टरांत दोनूय पंगडांनी चुरशीचो खेळ केलो. मॅचींतलो पयलो गोल 7व्या मिनटाक पाकिस्तानाच्या अहमद नदीमान केलो. शाहीन बॉल डी भितर मारलो. थंय उबो आशिल्ल्या नदीमान डिफ्लेक्ट करून बॉल गोलपोस्टांत घालो. ह्या गोलान पाकिस्तानान 1-0 अशी आघाडी घेतली.
ते उपरांत 13व्या मिनटाक हरमनप्रीत सिंगान पॅनल्टी कॉर्नराचेर गोल करून भारत बरोबरी मेळोवन दिली. दुसऱ्या क्वॉर्टराचे सुरवातीक हरमनप्रीतान आपलो आनी पंगडाचो दुसरो गोल करून भारताक आघाडी मेळोवन दिली. हो गोल निर्णायक थारलो.
पाकिस्तानान ते उपरांत बरोबरी करपाचो खूब यत्न केलो. पूण, गोलकीपर कृष्णा पाठकान उत्कृश्ट बचाव केलो.
आशियायी चॅम्पियन्स ट्रॉफींत ह्या पंगडां मदीं 12 मॅची जाल्यात. तातूंतल्य 8 मॅची भारतान जिखल्यात. पाकिस्तानान दोन मॅची जिखल्यात, जाल्यार दोन मॅची बादाबाद उरल्यात.मजगतीं, मलेशिया आनी दक्षीण कोरिया ह्या पंगडां मदीं लेगीत चुरशीची मॅच जाली. अखेरेक ही मॅच 3-3 अशी बादाबाद उरली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
