भारताची हारीन सुरवात

भांगरभूंय | प्रतिनिधी

19 वर्सां पिराये सकयले आशिया करंड क्रिकेट सर्तींत भारताची सुरवात हारीन जाली. ताका पयले मॅचींत पाकिस्ताना आड हारीचो धपको बसलो. भारता वतीन निखील कुमारान अर्द शेंकड्याची खेळी केली. पूण, ताका हेरां कडल्यान योग्य अशी साथ मेळूंक ना. ताका लागून अखेरेक भारताक 44 धांवड्यांनी हार घेवची पडली.
पाकिस्तानान पयलीं बॅटींग करून 7 विकेटी व्हगडावन भारता मुखार जैता खातीर 282 धांवड्यांची मोख दवरिल्ली. हाचो फाटलाव करपी भारताक 47.1 ओव्हरींनी 238 धांवड्यो करप शक्य जाल्यो.
भारता वतीन 13 वर्सां पिरायेच्या वैभव सूर्यवंशीन आनी आयुष म्हात्रे हाणें डावाची सुरवात केली. पूण, चवथेच ओव्हरींत पांच चवक्यांचे मजतीन 20 धांवड्यो करपी आयुषाक अब्दुल सुभान हाणें बाद केलो. फाटोफाट फुडले ओव्हरींत सूर्यवंशी 9 बॉलांनी 1 धांवडी करून बाद जालो.
आंद्रे सिद्धार्थ लेगीत 15 धांवड्यो करून बाद जालो. ते उपरांत मुखेली मोहम्मद अमीन आनी निखील कुमर हांणी डाव सांबाळपाचो यत्न केलो. पूण, अमीनाक उस्मान ख्वाजान 16 धांवड्यांचेर बाद केलो. अहमद हुसैनान ताची कॅच धरली.
ते उपरांत मात, किरण चोरमाळेन निखीलाक साथ दिवपाक सुरवात केल्ली. तांची भागिदारी लेगीत बरी जाताली. पूण, 31वे ओव्हरींत किरणाक फाहम-उल-हकान बाद करून भारताक 5वो धपको दिलो. ते उपरांत लेगीत निखिलान हरवंश सिंगाक वांगडा घेवन डाव मुखार व्हेलो. ताणें अर्द शेंकडो पुर्ण करून भारताक 170 धांवड्यांचो टप्पो हुपून दिलो. पूण, अर्द शेंकड्या उपरांत ताची ही लडाय 36वे ओव्हरींत नवीद अहमद खानान सोंपयली. ताणें 77 बॉलांनी 67 धांवड्यांची खेळी केली. हातूंत स चवके आनी तीन सक्यांचो आस्पाव आशिल्लो. ते उपरांत मात, भारतान हरवंश (26), समर्थ नागराज (0) आनी हार्दिक राज (10) हांच्यो विकेटी रोखड्योच व्हगडायल्यो.
अखेरेक मोहम्मद इनान आनी युधजीत गुहा हांणी खर प्रतिकार करपाचो यत्न केलो. दोगांयनी 47 धांवड्यांची भागिदारी केली. पूण, अखेरेक मोहम्मद इनान 30 धांवड्यांचेर बाद जाल्ल्यान भारताचो डाव सोंपलो. युधजीत 12 धांवड्यांचेर नाबाद उरलो.
पाकिस्ताना वतीन अली रझान सगल्यांत चड 3 विकेटी घेतल्यो. तशेंच अब्दुल सुभान आनी फाहम-उल-हक हांणी दरेकी 2 विकेटी मेळयल्यो. तशेंच नवीद अहमद खान आनी उस्मान खान हांकां एकेक विकेट फावो जाली.
ते पयलीं, पाकिस्तानान टॉस जिखून पयलीं बॅटींग करपाचो निर्णय घेतिल्लो. पाकिस्ताना वतीन ओपनर उस्मान खान आनी शाहजैब खान हांणी जबरदस्त सुरवात करून दिली. दोगांयनी पयले विकेटी खातीर 160 धांवड्यांची भागिदारी केली. पूण, उपरांत आयुष म्हात्रेन उस्मान खानाक 60 धांवड्यांचेर बाद केलो. ताच्या फाटोफाट ताणें हरुन अर्शदाक लेगीत बाद केलो.
पूण, उपरांत मोहम्मद रियाझुल्लान शाहजैबाक साथ दीत अर्द शेंकड्याची भागिदारी केली. ते उपरांत रियाझुलाक 27 धांवड्यांचेर समर्थ नागराजान बाद केलो. फुडल्या बॉलाचेर फरहान युसुफ शुन्याचेर तंबूंत परतलो. ते उपरांत फाहम-उल-हक (4) आनी मुखेली साद बैग (4) सवाय भितर बाद जाले. अखेरच्या ओव्हरींनी शाहजैब बाद जालो. ताणें 147 बॉलांनी पांच चवके आनी 10 सक्यांचे मजतीन 159 धांवड्यो केल्यो.
भारता वतीन समर्थ नागराजान सगल्यांत चड 3 विकेटी घेतल्यो. तशेंच आयुष म्हात्रेन 2 विकेटी घेतल्यो. युधजीत गुहा आनी किरण चोरमळे हांकां दरेकी एक विकेट फावो जाली.