भांगरभूंय | प्रतिनिधी
भांगरभूंय । प्रतिनिधी
पेडणेः नागपूर हांगच्या भरत मलिक खेळा मंडळाचो अध्यक्ष दिलीप मलिक सध्या सायकली वयल्यान भारत यात्रा करतात. तो गोयांत आयल्या उपरांत धारगळ हांगा ताचे कडेन चर्चा केली तेन्ना नितळ भारत अभियान, बेटी बचाव, बेटी पढाव, झाडांचें, पर्यावरणाचें संवर्धन, वेसन मुक्तताय ह्या सारके लोकांक संदेश दिवपा खातीर सायकल यात्रा सुरू केल्या अशें सांगलें.
26 जानेवारी 2022 दिसा ताणे ही सायकल यात्रा सुरू केल्ली. 31 ऑगस्ट 2022 दिसा ताणे 21250 किलोमीटरांचो पयलो पांवडो पुराय केलो. दुसरो पावंडो 5 सप्टेंबराक सुरू करून 19 जानेवारी 2023 दिसा पुराय केलो. 12 मे तें 15 ऑगस्ट 2023 मजगतीं 7600 किलोमीटरांचो पांवडो ताका पुराय करपाचो आसा. 50 हजार 86 किलोमीटर सायकल प्रवास करून गिनीज रेकॉर्ड बुकांत नांव नोंद करपाचो आपलो यत्न् आसा अशें ताणे सांगलें.
धारगळ हांगा उजो पालोवपी दलाचो अधिकारी प्रशांत धारगळकार, भोवमजन समाज फुडारी उमेश तळवणेकार आनी सुनील नायक हाणे ताका गोंयांत येवकार दिलो. दिसाक 120 किलोमीटर प्रवास करपाचो आपलो यत्न आसता. कांय वेळार सैमीक आडमेळ्यांक आनी हेर गजालींक तोंड दिवचें पडटा. मात जे साध्य करपाचें आसा तें पुराय करपाचो ताचो निर्धार आसा. प्रदूशण मुक्त वाठार, तरणाट्यांनी वेसना पसून पयस रावचें आनी भलायकी बरी दवोरपाचो संदेश आपूण दित फिरतां अशें तांणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
