भांगरभूंय | प्रतिनिधी
‘ग्लोबल ट्रेड रिसर्च इनिशिएटिव्ह’ च्या अहवालांतल्यान स्पश्ट
नवी दिल्ली, खबरां संस्था ः भारताची शेतकी निर्यात तांदूळ आनी साकर सयत पांच उत्पादनांचेर आदारून आसा, ताका लागून आंतरराष्ट्रीय दर आनी मागणींतल्या उतार-चढावाक लागून हो क्षेत्र अस्थिर जाला अशें सोमारा जाहीर केल्ल्या ‘ग्लोबल ट्रेड रिसर्च इनिशिएटिव्ह’ च्या (जीटीआरआय) अहवालांतल्यान स्पश्ट जालां.
जीटीआरआयन शेतकी निर्यातीचेर जाहीर केल्ल्या अहवाला प्रमाण भारताची शेतकी निर्यात मुखेलपणान बासमती तांदूळ, बासमती नाशिल्लो तांदूळ, साकर, मसालो आनी पिठ अशा पांच उत्पादनांचेर आदारून आसा. देशाचे वट्ट निर्यातींत तांचो वांटो 51.5 टक्के आसा. आंतरराश्ट्रीय पांवड्यार दरांत आनी मागणींतल्या उतार-चढावाचो परिणाम ह्या उत्पादनांचेर जाता. हाका लागून भारतांतल्यान ह्या उत्पादनांची निर्यात करपाचेर बंदी घाल्या. सध्या बिगर बासमती तांदूळ निर्यातीचेर बंदी आसा आनी भौशीक धान्य वितरण कार्यावळींतल्यान तांदूळ आनी गंव हांचेर अनुदान मेळोवपा खातीर भारत संवसारीक वेपार संघटने खाला झुजता.
सध्या भारताच्या शेतकी वेवार क्षेत्रात जायतीं आव्हानां निर्माण जाल्यात. देशाची शेतकी निर्यात चालू वर्सा 43.3 अब्ज डॉलर मेरेन पावतली असो अदमास आसा. त्याच वेळार आयात 33 अब्ज डॉलर मेरेन पावपाचो अदमास आसा. फाटल्या वर्साचे तुळेंत अंदूं निर्यात 7.2 टक्क्यांनी आनी आयात 10.1 टक्क्यांनी उणी जातली अशें अहवालांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
