भांगरभूंय | प्रतिनिधी
22 एप्रील दिसा पहलगामांत पाक पुरस्कृत आतंकवादी हल्ल्यांत 26 निश्पाप पर्यटकांक मरण आयिल्लें. ह्या भिजूड हल्ल्या उपरांत पुराय भारतांत तिडकीचें ल्हार पातळिल्लें. आतंकवाद्यांनी केल्लो हो भिजूड हल्लो पर्यटकांचेर नाशिल्लो जाल्यार तो भारताच्या सार्वभौमत्वाचेर आशिल्लो. ताका लागून भारत पाकिस्तानाच्या ह्या भिजूड हल्ल्याक केन्ना योग्य जाप दितलो? असो प्रस्न लोक विचारताले. हाची जाप बुधवारा मेळ्ळी. बुधवार 7 मे दिसा मध्यान रातीं 1.28 मिणटांनी भारतीय हवाई दळान पाकव्याप्त कश्मीराचेर हवाई हल्ले केले. भारतीय हवाई दळान केल्ल्या ह्या हल्ल्यांत पाकव्याप्त कश्मीरांतल्या णव आतंकवादी तळाचेर हल्ले करून आतंकवाद्यांचें भेंड मोडलें.
भारतीय हवाई दळान केल्ल्या ह्या हल्ल्यांत शेंकड्यांनी आतंकवाद्यांक मरण आयलें. भारतान केल्ल्या ह्या हल्ल्यांत कितले आतंकवादी मेले हाचो आंकडो मुखार येवंक नासलो तरी ह्या हल्ल्यांत 100 परस चड आतंकवाद्यांक मरण आयिल्ल्याची शक्यताय आसून हातूंत लश्कर ए तोयबा आनी जैश ए मोहम्मदचे खूबश्या मोट्या आतंकवाद्यांक मरण आयलां. भारतीय हवाई दळान सुमार 23 मिणटां हल्ले केले. भारतान केल्ल्या हवाई हल्ल्याक ‘ऑपरेशन सिंदूर’ अशें नांव दिलां. पहलगामांत जाल्ल्या भिजूड हल्ल्यांत ज्या भारतीय बायलांचो ककूम (सिंदूर) पुसला त्या बायलांच्या भोवमाना खातीर हे मोहिमेक लश्करान ‘ऑपरेशन सिंदूर’ अशें नांव दिलां. ऑपरेशन सिंदूर येसस्वी करून भारतीय सैन्यान पहलगामांत मरण आयिल्ल्या 26 पर्यटकांच्या हत्येचो बदलो घेतला. भारतीय सैन्याची ही कामगिरी तोखणायेची आनी हड्डें फुलोवपी आसा.
पाकिस्तानाक जाशाक तशी जाप दिवपी भारतीय सैन्याच्या ह्या गौरवपूर्ण कामगिरीन 140 कोटी भारतीयांची मान अभिमानान उंचावल्या. भारतीय सैन्याच्या ह्या कामगिरीचो देशवासियांक सार्थ अभिमान आसून 140 कोटी भारतीय, भारतीय सैन्यदळा मुखार नतमस्तक आसा. जो भारता कडेन वांकडे नदरेन पळयतलो ताका भारत घरांत घुसून मारतलो अशी शिटकावणीच भारतान संवसाराक दिल्या. भारताच्या सार्वभौमत्वाक आव्हान दिवपाची गय करचे नात. ‘अॅक्शनाक रिअॅक्शन’ मेळटलेंच. हो भारत 2025 चो भारत आसा हें भारतान पाकिस्तानाक परतून एकदां दाखोवन दिलां. ही मोहीम येसस्वी करून भारतीय सैन्यदळान आपले सामर्थ्य जगाक दाखोवन दिलां. अर्थांत भारतान पाकव्याप्त कश्मीराचेर केल्लो हो पयलो हवाई हल्लो न्हय. हाचे आदीं 2016 वर्सा आनी 2019 वर्सा भारतान असोच हवाई हल्लो करून पाकिस्तानाक शिटकावणी दिल्ली. पूण दोन फावटी हवाई हल्लो जावन लेगीत पाकिस्तानाची शेंपडी वांकडी ती वांकडीच. पाकिस्तानान आतंकवाद्यांक अर्थीक आनी लश्करी मजत करप चालूच दवरलें. ताचो परिणाम पाकिस्तानाक भोगचो पडलो. आतां तरी पाकिस्तानान शाणे जावचें आनी आतंकवाद्यांक करतात ती लश्करी आनी अर्थीक मजत बंद करची, नाजाल्यार भारत हाचे परस मोटी कारवाय करतलो.
1971 वर्सा भारतान पाकिस्तानाचे दोन तुकडे केल्ले. जर पाकिस्तानान आपली खोड मोडली ना जाल्यार फुडारांत पाकिस्तानाचे चार तुकडे जातले. भारतान पाकव्याप्त कश्मीराचेर केल्ल्या ह्या हवाई हल्ल्याक पाकिस्तान कशी जाप दिता तें पळोवचें पडटलें. अर्थांत ह्या हवाई हल्ल्याक पाकिस्तानान प्रतिजाप दिली जाल्यार ती पाकिस्तानाची सगल्यांत मोटी चूक थारतली. जर पाकिस्तानान तशें करीत जाल्यार भारत-पाकिस्तान झुजाक तोंड फुट्टलें. भारत-पाकिस्तान झुजाक तोंड फुटत जाल्यार पाकिस्तान जगाच्या नकाशा वेल्यान गायब जावंक शकता हाचें भान पाकिस्तानान दवरचें. पाकिस्तानान चीनाच्या भरवंशाचेर भारता कडेन दोन हात करचे न्हय. कारण आयचो भारत हो चीनाकूय जशाक तशी जाप दिवपाक सक्षम आसा. चीनान पाकिस्तानाची बाजू लावन धरची न्हय कारण आतंकवाद्या आडच्या ह्या झुजांत भारताक खूबशा देशांचो तेंको आसा. अमेरिका, इस्रायल, जपान, रशिया ह्या देशांनी आतांच भारताक पुराय तेंको दिला. पाकिस्तानाक जरी तुर्कस्तान, मलेशिया आनी कांय इस्लामीक देशांनी तेंको दिल्लो आसलो तरी जगांतले स मुखेल देश भारता वटेन आसात हें पाकिस्तानान विसरूंक फावना.
पाकिस्तानान जर परतून भारताची कुरापत काडली जाल्यार ताची ख्यास्त पाकिस्तानाक मेळटलीच हातूंत दुबाव ना. ‘ऑपरेशन सिंदूर’ येसस्वी करपी भारताच्या सैन्यदळाक सॅल्यूट! जयहिंद!!
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
