भांगरभूंय | प्रतिनिधी
नवी दिल्ली, खबरां संस्था ः 2016 वर्सा देशांत डिजिटल वेव्हार पद्दत व्हड प्रमाणांत सुरू जाली. कॅशलेस वेव्हाराक चालना दिवपा खातीर यूपीआय सुरू केले. आनी यूपीआय वरवीं वेव्हार करप सगळ्यांच सोंपें जाले.
सप्टेंबर 2023 वर्सा नवी दिल्लींत जाल्ल्या जी- 20 त युपीआय वरवीं डिजिटल वेव्हाराच्या मळार भारताच्या कामगिरीची जायत्या देशांनी तोखणाय केल्या. अमेरिका, जपान, ब्रिटन वा फ्रांस दरेक देश यूपीआय आपणावन डिजिटल पेमेंटाची उर्बा वाडोवपाक सोदता.
श्रीलंकेच्या भोंवडेर आशिल्ली अर्थमंत्री निर्मला सीतारमण हांणी श्रीलंकेंत बेगीनूच युनिफायड पेमेंट इंटरफेस सुरू जातलें अशें बिरेस्तारा 2 नोव्हेंबराक एका कार्यावळींत जाहीर केलें. नॅशनल स्टॉक एक्सचेंजाचे सीईओ आशीष चौहान हांणी सोशल मिडिया प्लॅटफॉर्म एक्साचेर बरयलां, ‘2022-23 वित्तीय वर्सा 1.7 ट्रिलियन डॉलर वेव्हार जाला. भारताच्या यूपीआयक पुराय संवसारान पसंती दिल्या. जपान, सिंगापूर, युएई, फ्रांस आनी ब्रिटनाक आपल्या देशांत यूपीआय आपणावपाक जाय. हें अर्थीक वर्स सोंपलें उपरांत फुडल्या 6 म्हयन्यांत यूपीआय वेव्हार आनीक वाडटले. अंदूं यूपीआय वेव्हार नवो विक्रम तयार करतलो.
कांय दिसां आदीं जर्मन दूतावासान सोशल मिडिया प्लॅटफॉर्म एक्साचेर एक फोटो शेअर केल्लो. तातूंत जर्मनीचो फेडरल डिजिटल आनी येरादारी मंत्री वोल्कर विसिंग किराणा दुकानांत खरेदी करतना दिसलो आनी ताणें यूपीआय वरवीं डिजिटल पेमेंट केलो.
यूपीआय ही सगळ्यांत येस्सवी डिजिटल पेमेंट पद्दत. सात वर्सां आदीं एप्रिल 2016 वर्सा नॅशनल पेमेंट कॉर्पोरेशन ऑफ इंडियान यूपीआय म्हळ्यार युनिफायड पेमेंट इंटरफेस सुरू केलें. युपीआयन भारतांतल्या डिजिटल पेमेंट इन्फ्रास्ट्रक्चराच्या संवसारांत बदल घडोवन हाडलो. डिजिटल पेमेंटाचे नदरेन भारतान यूपीआय वरवीं नामना मेळयल्या. देशांत कॅशलेस अर्थवेवस्थेक चालना दिवपा खातीर एनपीसीआय, रिझर्व्ह बँक ऑफ इंडिया आनी इंडियन बँक्स असोसिएशन हांणी संयुक्तपणान यूपीआय सुरू केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
