भांगरभूंय | प्रतिनिधी
भारत संवसारीक टी-20 सर्तींतली आपली पयली मॅच आयज आयर्लेण्डा आड न्युयॉर्क शारांत खेळटलो. ही मॅच भारताच्या वेळा प्रमाण रातच्या आठ वरांचेर सुरू जातली.
दोनूय पंगडां मदीं ही वट्ट णववी मॅच आसतली. अजून मेरेन जाल्ल्या आठांतल्यो सात मॅची भारतान जिखल्यात, एक मॅच रद्द जाल्या. संवसारीक टी-20 सर्तींत एकेच मॅचींत ते एकामेका आड खेळ्ळ्यात आनी हातूंत भारतानूच जैत जोडलां.
भारतान 2007त वस्तादपण जोडलां, जाल्यार आयर्लेण्ड 2009त सुपर आठांत पाविल्लो. भारतान 2022त जाल्ले संवसारीक टी-20 सर्तीचे सेमी फायनलींत पाविल्लो, जाल्यार आयर्लेण्डान सुपर 12त भायर पडिल्लो.
भारतान आपली निमाणी आंतरराष्ट्रीय टी-20 मॅच वर्साचे सुरवातीक खेळिल्लो. त्या वेळार भारतान अफगाणिस्तानाक 3-0 असो हारयिल्लो. भारताचे सगले खेळगडे फाटले दोन म्हयने आयपीएलांत खेळ्ळ्यात आनी सगले फॉर्मांत आसात.
आयर्लेण्डान फाटल्या म्हयन्यांत स्कॉटलॅण्ड आनी आयर्लेण्ड ह्या पंगडां आड तिरंगी माळ खेळिल्लो. तातूंतल्यो चारांतल्यो चारूय मॅची जिखून वस्तादपण जोडिल्लें. ते आदीं ताणें पाकिस्ताना आडचे माळेंतली एक मॅच जिखिल्ली. पूण, पाकिस्तानान माळ 2-1 फरकान जिखपाक येस मेळयिल्लें.
विराट कोहली संवसारीक टी-20 क्रिकेट सर्तींत सगल्यांत येसस्वी बॅट्समन आसा. ताणें संवसारीक टी-20 सर्तींतल्या 25 डावांनी सगल्यांत चड 1141 धांवड्यो केल्यात. ताची सरासरी 81.5 इतकी आसा. तशेंच ताणें 14 अर्द शेंकडे मारल्यात. संवसारीक टी-20 सर्तींत खंयच्याय बॅट्समनान मारिल्ले हे सगल्यांत चड अर्द शेंकडे आसात. आयचे मॅचींत तो खंयचे सुवातेर बॅटींग करतलो हो पळोवपा सारको विशय आसा.
आयपीएलांत ताणें डावाची सुरवात केल्ली. ताणें अंदूंच्या आयपीएलांत सगल्यांत चड धांवड्यो करून ऑरेंज कॅप मेळयिल्लें. आंतरराष्ट्रीय टी-20 क्रिकेटींत ताणें णव मॅचींनी डावाची सुरवात केल्या. 57चे सरासरीन आनी 161चे स्ट्रायक रेटीन दोन अर्द शेंकडे आनी एका शेंकड्या नेटार धांवड्यो केल्यात. हरशीं चडशे खेपे तिसरे सुवातेर बॅटींग करता. हे सुवातेर बॅटींग करतना 54चे सरासरीन 3000 हजार धांवड्यो केल्यात.
आयर्लेण्डा कडेन जॉश लिटिल अणभवी फास्ट बॉलर आसा. ताका स्पिनर जॉर्ज डॉकरेल आनी गॅरेथ डेलनी साथ दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
