भारताची मॅचीचेर पकड

भांगरभूंय | प्रतिनिधी

भारतान येजमान बांगलादेशा आडचे पयले टॅस्टीच्या तिसऱ्या दिसा आपली पकड घट्ट केली. ताणें बांगलादेशाक जैता खातीर 513 धांवड्यांची मोख दिली.

तिसऱ्या दिसाचो खेळ सोंपलो त्या वेळार कठीण मोखीचो फाटलाव करतना बांगलादेशान बिनबाद 42 धांवड्यो केल्यात. जैता खातीर ताका आनीक 471 धांवड्यांची गरज आसा. खेळ थांबलो त्या वेळार जाकीर हसन (17) आनी नजमूल हसन शांतो (25) खेळपट्टीचेर आशिल्ले.

ते पयलीं भारतान आपलो दुसरो डाव 2 बाद 258 धांवड्यांचेर घोशीत केलो. भारता वतीन काल दोन शेंकड्यांची नोंद जाली. ओपनर शुभमन गिलान 110 धांवड्यो केल्यो, जाल्यार चेतेश्वर पुजारान नाबाद 102 धांवड्यांची खेळी केली. विराट कोहली 19 धांवड्यांचेर नाबाद उरलो.

पुजारान 51 डाव आनी तीन वर्सां 11 म्हयन्यांनी टॅस्ट शेंकडो मारलो. पुजारान 19वो शेंकडो पुर्ण केल्या उपरांत मुखेली लोकेश राहुलान डाव घोशीत केलो.

बांगलादेशाचो पयलो डाव फक्त 150 धांवड्यांचेर सोंपिल्लो. कुलदीप यादवान सगल्यांत चड 5 विकेटी घेतल्यो. मोहम्मद सिराजान 3 विकेटी मेळयल्यो. उमेश यादव आनी अक्षर पटेल हांकां दरेकी एक विकेट फावो जाली.

भारतान पयल्या डावाच्या आदाराचेर 254 धांवड्यांची आघाडी मेळिल्ली. बांगलादेशाक फॉलोऑन दिवपाची संद आशिल्ली. पूण, मुखेली राहुलान बॅटींग करपाचो निर्णय घेतलो. भारतान पयल्या डावांत 404 धांवड्यो केल्ल्यो.

डीआरएसान केलो बांगलादेशाचो घात

भारताचो ओपनर शुभमन गिलान दुसऱ्या डावांत टॅस्ट कारकिर्दींतलो पयलो शेंकडो पुर्ण केलो. ताणें आक्रमक बॅटींग करतना 152 बॉलांनी 110 धांवड्यो केल्यो. पूणष ताका शेंकड्याची खेळी करतना नशिबाची लेगीत साथ मेळ्ळी.

एेन वेळार डीआरएस बंद पडिल्ल्यान गिल बाद जावपा पसून वाटावलो.

भारताच्या दुसऱ्या डावाची 32वी ओव्हर यासीर अली करपाक आयलो.

पयलोच बॉल गिलाच्या पॅडाक लागलो. बांगलादेशाच्या खेळगड्यांनी अपील केलें. पूण, मैदानी अंपायरान हें अपील भायर मारून गिलाक नाबाद थारायलो. पूण, बांगलादेशाचो मुखेली शाकिब अल हसनान डीआरएस घेतलो. ते उपरांत मैदानांत गोंदळाचें वातावरण आशिल्लें. तंत्रीक इबाडा लागून डीआरएस घेवपाक मेळचो ना अशें अखेरेक अंपायरांनी शाकिबाक सांगलें.