भांगरभूंय | प्रतिनिधी
ऑक्टोबराच्या 16वेर पसून ऑस्ट्रेलियेंत संवसारीक टी-20 सर्तीक सुरवात जाता. हे सर्ती पयलीं भारतीय क्रिकेट नियामक मंडळान (बीसीसीआय) हालींच सोंपिल्ले आशिया करंड क्रिकेट सर्तींत पंगडान केल्ल्या प्रदर्शना संदर्भांत समिक्षा बसका घेतली. हातूंत सात ते 15 ओव्हरी मेरेन भारताच्या बॅट्समनांनी केल्ल्या प्रदर्शनाचेर हुस्को उक्तायला.
संवसारीक टी-20 सर्तींत भारत आपली पयली मॅच पाकिस्ताना आड मॅलबॉर्नांत खेळटलो.
बीसीसीआयन सोमारा संवसारीक टी-20 सर्त तशेंच ऑस्ट्रेलिया आनी दक्षीण आफ्रिका ह्या पंगडां आड जावपी माळां खातीर आपलो पंगड जाहीर केलो.
पंगड निवडी खेरीत बसकेंत बीसीसीआयचे अध्यक्ष सौरव गांगुली आनी सचीव जय शाह तशेंच राष्ट्रीय निवड समितीन आशिया करंड क्रिकेट सर्तींत केल्ल्या बाबत प्रदर्शनाचेर चर्चा केली.
बसकेंत समस्यां कश्यो सुटावो करपाक मेळटल्यो हाचेर चर्चा जाली. संवसारीक टी-20 सर्ती पयलीं हाचेर काम करतले अशें बीसीसीआयच्या एका वरिश्ठ अधिकाऱ्यान सांगलें.
बळिश्ट पंगडां आडच्या मॅचींनी खेळटना मदल्या ओव्हरींनी भारतान आपणायिल्ली रणनिती हुसक्याचो विशय आसा आनी ह्याच कारणांक लागून भारताचें आव्हान आशिया करंड क्रिकेट सर्तींत पयलींच सोंपलें अशें त्या अधिकाऱ्यान सांगलें.
सातवे ते 15वे ओव्हरी मेरेनचो खेळ पयलो जाल्यार भारतान चड धांवड्यो करूंक ना. पाकिस्ताना आड ह्या ओव्हरींचे मजगतीं 3 विकेटी वगडावन फक्त 59 धांवड्यो केल्यो. हॉंगकॉंग सारक्या दुबळ्या पंगडा आड लेगीत भारतान फक्त 62 धांवड्यो केल्यो. पाकिस्ताना आडचे सुपर चारांतले मॅचींत लेगीत 62 धांवड्यो केल्यो आनी एक विकेट लेगीत वगडायल्यो.
ह्या णव ओव्हरींनी भारतान फक्त श्रीलंके आड उत्कृश्ट प्रदर्शन केल्लें. त्या वेळार भारतान ह्या णव ओव्हरींनी 78 धांवड्यो केल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
