भारताची पयली मॅच बांगलादेशा आड

भांगरभूंय | प्रतिनिधी

फुडल्या वर्सा जावपी 19 वर्सां पिराये सकयले संवसारीक क्रिकेट सर्ती खातीर आंतरराष्ट्रीय क्रिकेट समितीन (आयसीसी) नवें वेळापत्रक जाहीर केलें. ह्या नव्या वेळापत्रका प्रमाण सर्त दक्षीण आफ्रिकेच्या पांच सुवातांचेर 19 जानेवारी ते 11 फेब्रुवारी मेरेन चलतली. सर्तींत वट्ट 41 मॅची जातल्यो. फायनल 11 फेब्रुवारीक विलोमूर पार्कांत जातली.

खरें म्हणल्यार ही सर्त श्रीलंकेंत जावपाची आशिल्ली. पूण, आयसीसीन श्रीलंका क्रिकेट मंडळाक निलंबीत केल्ल्यान ताच्या कडल्यान येजमानकी काडून घेतली.

हे खेपेची सर्त नव्या फॉर्मेटांत जातली. 16 पंगडांक चार गटांनी विभागल्यात. दरेक गटांतले पयले तीन पंगड सुपर सिक्साक पात्र जातले. सुपर सिक्सांत 6-6 पंगडांचे दोन गट करतले. दोनूय गटांतले पयले दोन पंगड सेमी फायनलीक पात्र जातले हातूंत जिखपी पंगडां मदीं फायनल जातली.

उक्तावणाची मॅच येजमान दक्षीण आफ्रिका आनी वॅस्ट इंडीज ह्या पंगडां मदीं जेबी मार्क्स ओव्हल मैदानाचेर 19 जानेवारीक जातली. जाल्यार भारताची पयली मॅच बांगलादेशा आड 20 जानेवारीक मेगॉन्ग ओव्हलांत जातली. भारत गट पांवड्यार बांगलादेश, आयर्लेण्ड आनी अमेरिका ह्या देशां आड खेळटलो. सगल्यो मॅची मेगॉन्ग ओव्हल मैदानाचेर जातल्यो.

अजून मेरेन 14 सर्ती जाल्यात. भारत सध्याचो वस्ताद आसा. भारतान सगल्यांत चड पांच खेपे ही सर्त जिखल्या. ऑस्ट्रेलियेन तीन आनी पाकिस्तानान दोन खेपे वस्तादपण जोडलां. बांगलादेश, दक्षीण आफ्रिका, वॅस्ट इंडीज आनी इंग्लंड ह्या पंगडांनी एकेक फावट ही सर्त जिखल्या.