भांगरभूंय | प्रतिनिधी
खबरां संस्था
हैदराबादः बांगलादेशाक पयल्या दोन मॅचींनी हारोवन पयलींच टी-20 माळ बोल्सांत घालपी भारत आतां क्लीन स्वीप करपाचो यत्न करतलो. तिसरी आनी निमाणी मॅच हैदराबादाच्या राजीव गांधी आंतरराष्ट्रीय स्टेडीयमाचेर जातली.
आयचे मॅची खातीर भारताचो पंगड वेवस्थापन आपल्या 11 वांगड्यांच्या पंगडांत कांय बदल करपाक शकता. दुसरे वटेन बांगलादेश किमान आयची मॅच जिखून भोंवडेची अखेर गोड करपाक इत्सूक आसतलो. टॅस्ट माळेंत ताका 0-2 अशी हार घेवची पडिल्ली.
उप्पल स्टेडीयमाची खेळपट्टी बॅट्समनां खातीर अनुकूल आसा. ह्या मैदानाचेर अजून मेरेन दोन टी-20 मॅची जाल्यात आनी दोनूय खेपे भारतान मोखीचो फाटलाव करून जिखल्यात. 2019त वॅस्ट इंडिजान पयलीं बॅटींग करून 207 धांवड्यो केल्ल्यो. भारतान 18.4 ओव्हरींनी मोख मेळयिल्ली. दुसरी मॅच 2022त भारत आनी ऑस्ट्रेलिया ह्या पंगडां मदीं जाल्ली. त्या वेळार ऑस्ट्रेलिया पंगडान पयलीं बॅटींग करून 186 धांवड्यो केल्ल्यो. भारतान एक बॉल बाकी दवरून जैत मेळयिल्लें.
मॅचींत धांवड्यांचो पावस पडपाची शक्यताय आसा जाल्यार दुसरे वटेन पावस मॅचीक हाडपाची शक्यताय आसा. हवामान खात्या दिल्ले म्हायती प्रमाण आयज पावस पडपाची शक्यताय आसा.
भारतान पयलींच माळ जिखिल्ल्यान जांकां अजून मेरेन खेळपाची संद मेळूंक ना तांकां आयचे मॅचींत निमाण्या इकरांत सुवात मेळुये. हर्षित राणाक पदार्पणाची संद आसा. तशेंच रवी बिश्नोई लेगीत खेळपाक शकता. संजू सॅमसनाक दोनूय मॅचींनी म्हणपा सारकें प्रदर्शन करपाक जमूंक ना, ताचे सुवातेर विकेटकीपर बॅट्समन जितेश शर्माक संद दिवपाक शकता.
सॅमसनान पयले मॅचींत 16 आनी दुसरे मॅचींत 29 धांवड्यो केल्यात. ते पयलीं श्रीलंके आड जाल्ले माळेंत तो सेगीत दोन मॅचींनी शुन्याचेर बाद जाल्लो. जर समसनाक भायर बसयलो जाल्यार अभिषेक शर्मा वांगडा डावाची सुरवात कोण करतलो हो लेगीत पंगड वेवस्थापना मुखार प्रस्न आसा.
भारताचो संभाव्य पंगडः सूर्यकुमार यादव (मुखेली), अभिषेक शर्मा, संजू सॅमसन/जितेश शर्मा (विकेटकीपर), रियान पराग, नीतीश कुमार रेड्डी, हार्दिक पांड्या, रिंकू सिंह, वॉशिंग्टन सुंदर, रवि बिश्नोई, मयंक यादव, हर्षित राणा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
