भारताची नदर क्लीन स्विपाचेर

भांगरभूंय | प्रतिनिधी

भारत आनी येजमान श्रीलंका ह्या पंगडां मदीं आयज तिसरी आनी निमाणी टी-20 मॅच जातली. पयल्यो दोन मॅची जिखून भारतान माळ पयलीं आपल्या नांवार केल्या. पूण, आयची मॅच जिखून क्लीन स्वीप करपाचो ताचो यत्न आसतलो. आयतारा जाल्ले दुसरे मॅचींत पावसान आडखळ हाडिल्ली. ते उपरांत डकवर्थ लुईस नेमा खाला भारतान 7 विकेटींनी जैत जोडिल्लें.

भारतान अजून मेरेन सगल्या विभागांनी उत्कृश्ट प्रदर्शन केलां. भारताचे रणनिती आनी कुशळटायेंतलो आत्मविस्वास स्पश्टपणान दिसता. सध्या तांचेर कसलेंच चेपण ना. भारताचो नवो मुखेली सूर्यकुमार यादव फॉर्मांत आसा. ताणें पयल्या दोन मॅचींनी वळेरेन 58 आनी 26 धांवड्यांची खेळी केल्या.

पयले मॅचींत भारतान 200च्या वयर धांवड्यो केल्ल्यो. भारतान दुसरे मॅची खातीर बॅटिंगेंत बदल केल्लो. उप मुखेली आनी ओपनर शुभमन गिलाचे सुवातेर संजू सॅमसनाक निमाण्या इकरांत सुवात दिल्ली. शुभमनाक दुखापत जाल्या, ताका लागून तो आयचे मॅचींत खेळटलो काय ना हें विशीं स्पश्ट ना.

भारताचो पंगड: सूर्यकुमार यादव (मुखेली), शुभमन गील, यशस्वी जयस्वाल, रिंकू सिंह, रियान पराग, ऋषभ पंत (विकेटकीपर), संजू सॅमसन (विकेटकीपर), हार्दीक पांड्या, शिवम दुबे, अक्षर पटेल, वॉशिंग्टन सुंदर, रवि बिश्नोई, अर्शदीप सिंह, खलील अहमद आनी मोहम्मद सिराज.