भांगरभूंय | प्रतिनिधी
भारत आनी अफगाणिस्तान ह्या पंगडां मदीं आयज माळेंतली तिसरी आनी निमाणी मॅच हांगाच्या चिन्नास्वामी स्टेडियमाचेर जातली. पयल्यो दोन मॅची जिखून भारतान माळ पयलींच आपल्या बोल्सांत उडयल्या. पूण, आयचीय मॅच जिखून क्लीन स्वीप करपाचो ताचो यत्न आसतलो.
कुलदीप यादवाक रवि बिश्नोई वा वॉशिंग्टन सुंदराचे सुवातेर आनी आवेश खानाक मुकेश कुमाराचे सुवातेर खेळोवपा विशीं पंगड वेवस्थापन विचार करता.
दुसरे वटेन अफगाणिस्तानाक अणभवी अश्टतासांचो खेळगडो राशीद खानाची गैरहाजेरी जाणावता. ताचे फाटींचे ऑपरेशन केलां आनी तातूंतल्यान तो अजून पुर्ण बरो जावंक ना. फाटले दोनूय मॅचींनी भारताच्या बॅट्समनांचेर आपलो शेक दवरपाक अफगाणिस्तानाच्या बॉलरांक अपेस आयिल्लें.
चिन्नास्वामी स्टेडियमाची खेळपट्टी ही बॅट्समनां खातीर स्वर्ग मानतात. पूण, अजून मेरेन ह्या मैदानाचेर णव मॅची जाल्यात. पूण, फकत एकदाच स्कोर 200च्या वयर पावला.
फास्ट बॉलरांक मजत मेळपाक शकता. पूण, स्पिनरांक ह्या मैदानाचेर व्हड मजत मेळटली अशें दिसना. भारताचे बॅट्समन फॉर्मांत आसात. ताका लागून भारतान पयलीं बॅटींग करून व्हड स्कोर उबारलो जाल्यार अजाब जावचे ना.
संवसारीक टी-20 सर्त अंदूं वॅस्ट इंडीज आनी अमेरिका ह्या देशांनी जावपाची आसा. ते दिश्टीन भारता खातीर ही माळ म्हत्वाची आसा. हे मॅची वरवीं भारत संवसारीक टी-20 खातीर आपलो संतुलीत पंगड वेंचपाक सोदतलो.
विराट कोहली पयले मॅचींत खेळूंक नाशिल्लो. दुसरे मॅची खातीर तो पंगडांत सामील जाल्लो. तो आयिल्ल्यान बॅटींग फळयेक घटसाण फावो जाल्या. स म्हयन्यांनी आंतरराष्ट्रीय टी-20 प्रकारांत पुनरागमन करपी कोहलीन दुसरे मॅचींत 16 बॉलांनी 29 धांवड्यांची खेळी केल्ली. आयपीएलांत रॉयल चॅलेंजर्स बंगळुरूचें प्रतिनिधित्व करपी कोहलीचें हें घरचें मैदान आसा. ताका लागून ताच्या कडल्यान व्हड खेळीची आस्त प्रेक्षकांक आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
