भांगरभूंय | प्रतिनिधी
नवी दिल्ली, खबरां संस्था : भारत आनी मालदीव ह्या दोनूय देशांचे इतिहासीक आनी संस्कृतीक संबंद घट आसात. पूण फाटल्या वर्सा सावन हे संबंद इबाडल्यात. जानेवारी २०२४ वर्सा मालदीवाच्या एका मंत्र्यान प्रधानमंत्री नरेंद्र मोदी विशीं अपमानकारक विधान केल्लें. हाका लागून दोनूय देशांनी ताण वाडलो. भारतीय पर्यटकांनी मालदीवाक फाट केली. ताचो परिणाम आतां मालदीवाचेर जाल्लो दिसता. मालदीवाक भेट दिवपी भारतीय पर्यटकांचो आंकडो अंदूं जून म्हयन्यांत २.५ टक्क्यांनी उणो जाला, असो अहवाल मालदीव पर्यटन मंत्रालयान जाहीर केला.
१ जून ते १२ जून ह्या काळांत वेलाना आंतरराष्ट्रीय विमानतळाचेर वट्ट ४४,०१३ पर्यटकांक येवकार दिल्ल्याचें अहवालांत म्हणलां. फाटल्या वर्सा म्हळ्यार २०२३ वर्सा ८,५४,४०५ वर्साचे तुळेंत ह्या वर्साचे सुरवेक ९.६ टक्क्यांनी वाड जाल्या. २०२२ वर्सा ७,४७,१८३ इतली वाड जाल्या. जून म्हयन्यांत दर दिसा सरासरी ३,६६८ पर्यटक मालदिवाक भेट दिताले. उण्यांत उणे सात दीस पर्यटक मालदिवांत रावतात.
२०२४ वर्साचे सुरवातेक मालदिवांत वट्ट ९,३६,२५८ भोंवडेकारांक येवकार दिला. जानेवारींत १,९२,३८५ (१,९२,३८५) मेळ्ळे. फेब्रुवारी (२,१७,३९२), मार्च (१,९४,२२७), एप्रिल (१,६८,३६६) आनी मे म्हयन्यांत मालदिवाक १,१९,८७५ पर्यटक आयल्यात. २०२४ वर्सा आतां मेरेन दिसाची सरासरी ५,७०९ आशिल्ल्यान पर्यटक सरासरी आठ दीस रावतात. चिनांतल्यान ६०,६९९ पर्यटक मालदीवाक आयल्यात. ताचे उपरांत रशिया, इटली आनी अमेरिका आसात. पूण, फाटल्या तीन वर्सां सावन पर्यटक येवपाच्या मळार मुखार आशिल्ल्या भारतांतल्यान फकत ३१ हजार ४३७ पर्यटकांनी भेट दिल्या. भारतीय पर्यटक मालदीवांतल्यान पयस वतात तेन्ना ताचो देशाचे अर्थवेवस्थेचेर व्हड परिणाम जाता अशें दिसून आयलां.
मालदिवाचेर पयलींच रिणाचो भार आसा. त्या वेळार राष्ट्रपती मोहम्मद मुइज्जू हांणी भारता कडेन दुस्मानकाय ओडून चिनाक लागीं केलें. देखून भारतान मालदीवाक मजत करप बंद केलां. दुसरे वटेन चिनाचें मालदीचेर वट्ट २० टक्के रिण आसा. ताका लागून अर्थीक संकश्टांत सांपडिल्ल्या मालदिवाक चिना कडल्यान आनीक रीण घेतल्यार ताचें प्रमाण वट्ट ३७% जातलें. संवसारीक बँकेच्या आकडेवारी प्रमाण, मालदिवाचेर चिनाचें १.३७ अब्ज डॉलरांचें रीण आसा. चिनाक लागीं करप मालदिवाक फुडाराक म्हारग पडपाक शकता असो भंय आयएमएफान उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
