भांगरभूंय | प्रतिनिधी
येजमान भारतान आशिया हॉकी करंड सर्तींतली आपली पयली मॅच जिखली. बिहारांतल्या राजगीर शारांत जाल्ले अ गटांतले मॅचींत भारतान चीन पंगडाक 4-3 अशा निसट्ट्या फरकान हारायलो.
मुखेली हरमनप्रीत सिंगान हॅट्रीक केली. ताणें मॅचीच्या 20व्या, 33व्या आनी 47व्या मिनटाक गोल केले. भारता खातीर पयलो गोल दुसऱ्या क्वॉर्टरांत पॅनल्टी कॉर्नराचेर जुगराज सिंगान केलो. चीना वतीन डू शिहाओ हाणें पयलो, चेन बेनहाई हाणें दसरो आनी गाओ जिशेंग हाणें तिसरो गोल केलो. मॅचींतले सगले गोल पॅनल्टी कॉर्नराचेर जाले.
मॅचीचे सुरवाती सावन भारतान आक्रमक खेळ केलो. भारताक दोन पॅनल्टी कॉर्नर मेळ्ळे. पूण, ताका ताचें रुपांतर गोलान करपाक जमलें ना. तथापी, 13व्या मिनटाक चीनान मॅचींतलो पयलो गोल केलो. डू शिहाओ हाणें पॅनल्टी कॉर्नराचेर एक उत्कृश्ट लो ड्रॅग-फ्लिक करून हो गोल केलो. बॉल भारताच्या डिफॅण्डराच्या स्टिकाक लागलो आनी गोलपोस्टांत गेलो.
दुसऱ्या क्वॉर्टराचे सुरवातीक भारताक पॅनल्टी कॉर्नर मेळ्ळो. 18व्या मिनटाक जुगराज सिंगान जबरदस्त ड्रॅग फ्लिक सयत गोल केलो. ते उपरांत फक्त 2 मिनटांनी भारतान आनीक एक आक्रमण करून गोल केलो. मुखेल हरमनप्रीत सिंगान ड्रॅग-फ्लिक सयत भारताक आघाडी मेळोवन दिली.
मॅचीच्या 33व्या मिनटाक राजिंदर सिंगान उजवे विंगाचेर एक उत्कृश्ट चाल केली आनी भारताक पॅनल्टी कॉर्नर मेळोवन दिलो. ह्या वेळार हरमनप्रीत सिंग आनी जुगराज सिंग दोगूय तयार आशिल्ले. मुखेली हरमनप्रीतान एक शॉट घेतलो. बॉल थेट चीनाच्या गोलकीपराक लागलो आनी रिबावण्ड जावन गोलपोस्टांत गेलो. हरमनप्रीत सिंगाचो हो दुसरो गोल थारलो. हांगा भारतान 3-1 अशी आघाडी घेतली.
तिसऱ्या क्वॉर्टरांत चीनान उत्कृश्ट खेळ केलो. पंगडान आक्रमक हॉकी खेळ केलो. संद तयार केल्यो आनी ताचें गोलांत रुपांतरण केलें. भारताचो बचाव आनी गोलकिपींग हो विभाग दुबळो थारलो. ह्या क्वॉर्टरांत चीनान दोन गोल केले.
मॅचीच्या 39व्या मिनटाक भारताक पॅनल्टी स्ट्रोकाची संद मेळ्ळी. हरमनप्रीत हाणें मारिल्लो पॅनल्टी स्ट्रोक गोलपोस्टाक लागून भायर गेलो. ताका लागून भारतान आघाडी वाडोवपाची बरी संद व्हगडायली.
42व्या मिनटाक चीनाक सेगीत पॅनल्टी कॉर्नर मेळ्ळे. पयल्या यत्नांत बॉल भारताच्या रशराच्या पांयाक लागलो आनी तांकां आनीक एक पॅनल्टी कॉर्नर मेळ्ळो. दुसऱ्या यत्नांत गाओ जियांशेंग हाणें ड्रॅग फ्लीक मारलो, बॉल गोलकीपर कृष्ण पाठकाच्या पांयाक लागलो आनी गोलपोस्टांत गेलो.
चवथ्या क्वॉर्टराचे सुरवातीक 47व्या मिनटाक, भारताक आनीक एक पॅनल्टी कॉर्नर मेळ्ळो. हरमनप्रीत सिंगान पयलीं ड्रॅग फ्लिक मारली, ती गोलकीपरान आडायली. दुसरो शॉट लेगीत ब्लॉक केलो. पूण, तिसऱ्या यत्नांत हरमनप्रीतान ड्रॅग फ्लीक करून गोल केलो.
काल आनीक तीन मॅची जाल्यो. जपानान कझाकिस्तानाक 7-0 असो हारायलो. त्याच वेळार दक्षीण कोरियान चीन तायपे पंगडाक 7-0 हारायलो. आनीक एके मॅचींत मलेशियान बांगलादेशाक 4-1 हारायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
