भांगरभूंय | प्रतिनिधी
दक्षीण आफ्रिकेंत चालू आशिल्ले दादल्यांचे संवसारीक 19 वर्सां पिराये सकयले क्रिकेट सर्तींत भारतान आपले पयले मॅचींत बांगलादेशाक 84 धांवड्यांनी हारयलो. ब्लुमफोण्टेनांत आयोजीत केल्ले मॅचींत बांगलादेशान टॉस जिखून भारताक पयलीं बॅटींग करपाचें आमंत्रण दिलें. भारतान निर्धारीत 50 ओव्हरींनी 7 विकेटी वगडावन 251 धांवड्यो केल्यो. जैता खातीर 252 धांवड्यांचो फाटलाव करपी बांगलादेशाक 45.5 ओव्हरींनी 167 धांवड्यो करप शक्य जाल्यो.
भारता वतीन मुखेली उदय सहारन आनी आदर्श सिंग हाणें अर्द शेंकडो मारलो. सहारनान 64 आनी आदर्शान 76 धांवड्यांची खेळी केली. बॉलिंगेंत भारताच्या सौम्य पांडेन 4 विकेटी घेतल्यो.
भारताची सुरवात बरी जावंक ना. डावाची सुरवात आदर्श सिंग आनी अर्शिक कुलकर्णी हांणी केली. ओपनर अर्शिक कुलकर्णी सात धांवड्यो करून बाद जालो, जाल्यार मुशीर खान तीन धांवड्यो करून तंबूंत परतलो. दुसरी विकेट पडल्या उपरांत उदय सहारन आनी आदर्श हांणी डाव मुखार व्हेलो. दोगांयनी 116 धांवड्यांची भागिदारी केली.
बांगलादेशा वतीन मरुफ मृधान पांच विकेटी घेतल्यो. मोहम्मद रिजवान आनी मफफुजूर रहमान हाणें दरेकी एक विकेट घेतली.
मोखीचो फाटलाव करपी बांगलादेशाची लेगीत सुरवात बाबत जाली. ओपनर आशिकर रहमान आनी जिशान अहमद हे 14-14 धांवड्यो करून बाद जाले. मोहम्मद रिजवानाक खातें लेगीत उगडपाक जमलें ना. अहरार अहमद पांच धांवड्यो करून तंबूंत परतलो.
चवथे सुवातेर बॅटिंगेक आयिल्ल्या अरिफूल इस्लामान डाव सांबाळ्ळो. ताणें मोहम्मद शिहाब जेम्सा वांगडा 118 बॉलांनी 77 धांवड्यांची भागिदारी केली. इस्लाम 41 धांवड्यो करून बाद जालो.
मोहम्मद शिहाब जेम्सान (54) अर्द शेंकडो नोंदयलो. तो बाद जाल्या उपरांत उरिल्ले बॅट्समन फाटोफाट बाद जायत गेले. भारता वतीन सौम्य पांडेन चार विकेटी घेतल्यो. मुशीर खानाक दोन विकेटी फावो जाल्यो. प्रियांशू मोलिया आनी राज लिंबानीन एकेक विकेट मेळयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
