भांगरभूंय | प्रतिनिधी
येजमान भारतान वॅस्ट इंडिजा आडची दुसरी टॅस्ट 7 विकेटींनी जिखून दोन मॅचींची माळ 2-0 फरकान जिखली. पांचव्या दिसा ताका जैता खातीर फकत 58 धांवड्यांची गरज आशिल्ली. ताणें ती लोकेश राहुलाच्या (नाबाद 58) अर्द शेंकड्याचे मजतीन पांचव्या दिसाच्या पयल्या एका वरा भितर मेळयली.
58 धांवड्यांचो फाटलाव करतना भारताक दोन विकेटी व्हगडावच्यो पडल्यो. दिसाची सुरवात राहुल आनी साई सुदर्शन हांणी केली. भारत आरामान मोखी वटेन वतालो. पूण, रॉस्टन चेजाचो फूलर बॉल ड्रायव्ह करपाच्या यत्नांत सुदर्शन बाद जालो. स्लिपांत शे होपान उजवे वटेन डायव्ह मारून कॅच धरली.
ते उपरांत मुखेली शुभमन गिलान चेजाचे बॉलिंगेर कांय आकर्शक शॉर्ट मारले. पूण, खेळ बेगीन सोंपोवपाच्या यत्नांत तो चेजाचे बॉलिंगेर बाद जालो. ते उपरांत राहुल आनी ध्रुव जुरेल हांणी औपचारिकताय पूर्ण केली. हे मजगतीं, राहुलान आपलो अर्द शेंकडो पूर्ण केलो. मजगतीं, भारतान 2002 सावन वॅस्ट इंडिजा आड एकूय टॅस्ट माळ व्हगडावंक ना. 2002 सावन अजून मेरेन भारतान सेगीत 10 टॅस्ट माळो जिखल्यात. हो एक विक्रमूच आसा. शुभमन गिलाच्या फुडारपणाखाला भारतान पयली टॅस्ट माळ जिखली. भारत आतां मर्यादीत ओव्हरींच्यो माळो खेळपाक ऑस्ट्रेलियेचे भोंवडेर वतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
