भारताची आस्त कायम

भांगरभूंय | प्रतिनिधी

भारताच्या बायलांच्या पंगडान म्हत्वाच्या खिणाक आपल्या खेळाचो पांवडो वाडयलो आनी आशिया करंड सर्तीचो वस्ताद श्रीलंका पंगडाक 82 धांवड्यांनी हारयलो. न्युझिलॅण्ड पंगडा आड हार घेवची पडिल्ल्यान भारताची बायलांचे संवसारीक टी-20 सर्तीचे सेमी फायनलींत सुवात मेळोवपाचे आशेक धपको बशिल्लो. पूण, भारतान आपले दुसरे मॅचींत पाकिस्तानाक आनी काल श्रीलंका पंगडाक हारोवन सेमी फायनलींत सुवात मेळोवपाची आपली आस्त कायम राखली.

भारतान पयलीं बॅटींग करतना 20 ओव्हरींनी 3 विकेटी व्हगडावन 172 धांवड्यो केल्यो आनी उपरांत श्रीलंकेचो डाव 19.5 ओव्हरींनी 90 धांवड्यांचेर सोंपयलो.

स्मृती मानधना (50) आनी हरमनप्रीत कौर (नाबाद 52) हांच्या अर्द शेंकड्यांचे खेळीक शेफाली वर्मान (43) बरी साथ दिली. तांच्या नेटार भारतान 3 विकेटी व्हगडावन 172 धांवड्यो केल्यो. अंदूंचे सर्तींतली आतां मेरेनची ही सर्वोच्चो धांवसंख्या आसा.

शेफाली आनी स्मृती हांणी पयले विकेटी खातीर 98 धांवड्यांची भागिदारी केली. ते उपरांत हरमनप्रीत कौरान 27 बॉलांनी आठ चवके आनी एक सक्याचे मजतीन नाबाद 52 धांवड्यांची आक्रमक खेळी केली.

मोखीचो फाटलाव करपी श्रीलंकेची सुरवात सामकी बाबत जाली. फकत 6 धांवड्यांचेर ताणें आपल्यो म्हत्वाच्यो 3 विकेटी व्हगडायल्यो. जाल्यार 57 धांवड्यांचेर ताचो अर्दो पंगड तंबूंत परतून गेल्लो. रेणुका सिंगान डावांतल्या दुसऱ्या बॉलाचेर विष्मी गुणारत्नेक बाद केली. व्हड शॉर्ट खेळपाच्या यत्नांत कॅच बाद जाली. राधा यादवान एक जबरदस्त कॅच थरली. श्रेयंका पाटीलान भारताक म्हत्वाची विकेट मेळोवन दिली. तिणें मुखेली चमारी अटापट्टूक (1) बाद केली. रेणुकान आनीक एक धपको दितना हर्षिता समरविक्रमाक (3) तंबूंत धाडली.

कविशा दिलहारी (21) आनी अनुष्का संजीवनी (20) हांणी कांय वगत प्रतिकार केलो. पूण, अखेरेक तांकां वळेरेन आशा सोभना आनी अरुंधती रेड्डीन बाद केली.

निलाक्षिका सिल्वाक (8) रेड्डीन बाद केली. सोभनान दोन धपके दिले. सुगंधिका कुमारी (1) आनी इनोशी प्रियदर्शनी (1) अपेशी थारली. सोभनान चार ओव्हरींनी 19 धांवड्यो दीत 3 विकेटी घेतल्यो. रेड्डीन लेगीत चार ओव्हरींनी 19 धांवड्यो दिवन 3 विकेटी मेळयल्यो.

श्रीलंकेक 90 धांवड्यांचेर आडायिल्ल्यान नेट रनरेटींत ताणें न्युझिलॅण्डाक फाटीं घालो. भारताची नेट रनरेट आतां प्लसांत आयल्या. भारतान पाकिस्तानाक लेगीत रनरेटींत फाटीं घाला.