भांगरभूंय | प्रतिनिधी
येजमान भारतान हांगाच्या बसपारा क्रिकेट स्टेडियमाचेर जाल्ले मॅचींत श्रीलंका पंगडाक 67 धांवड्यांनी हारोवन तीन मॅचींचे वन डे माळेंत 1-0 अशी आघाडी घेतली.
भारतान दिल्ले 374 धांवड्यांचे मोखीचो फाटलाव करतना श्रीलंकेन 50 ओव्हरींनी 8 विकेटी वगडावन 306 धांवड्यो केल्यो. भारता वतीन उमरान मलिकान 3 विकेटी घेतल्यो. मोहम्मद सिराजाक दोन विकेटी फावो जाल्यो. तशेंच युजवेंद्र चहल, हार्दिक पांड्या आनी मोहम्मद शमी हांकां दरेकी एक विकेट फावो जाली.
श्रीलंके वतीन दसून शनाकान 88 बॉलांनी नाबाद 108 धांवड्यांची खेळी केली. जाल्यार पथुम निसंकान 80 बॉलांनी 72 धांवड्यांची खेळी केली. ह्या दोगां खेरीत धनंजय डीसिल्वान 40 बॉलांनी 47 धांवड्यांचें योगदान दिलें. ह्या तिगांक सोडले जाल्यार श्रीलंकेच्या हेर बॅट्समनांक बरें प्रदर्शन करपाक जमूंक ना.
ते पयलीं विराट कोहलीच्या शेंकड्या नेटार भारतान 50 ओव्हरींनी 7 विकेटी वगडावन 373 धांवड्यो केल्यो. कोहलीन आपलो 45वो वन डे शेंकडो पुर्ण केलो. कोहलीच्या शेंकड्या पयलीं रोहित शर्मा (83) आनी शुभमन गिल (70) हांणी बरी सुरवात करून दिली. दोगांयनी पयले विकेटी खातीर 143 धांवड्यांची भागिदारी केली.
गिलान 60 बॉलांनी 11 चवक्यांचे मजतीन 70 धांवड्यो केल्यो. दुसरे वटेन रोहित शर्माकूय अर्द शेंकड्याचें रुपांतर शेंकड्यांत करपाक जमूंक ना. 24वे ओव्हरींत दिलशान मदुशंकाच्या बॉलाचेर तो बोल्ड जालो. रोहितान 67 बॉलांनी णव चवके आनी तीन सक्यांचे मजतीन 83 धांवड्यो केल्यो.
30वे ओव्हरींत धनंजय डिसिल्वाच्या पयल्याच बॉलाचेर श्रेयस अय्यर बाद जालो. अविष्का फर्नांडोन ताची कॅच धरली. अय्यरान 24 बॉलानी 28 धांवड्यो केल्यो.
लोकेश राहुलानूय बरी बॅटींग केली. पूण, ताका व्हड खेळी करपाक जमली ना. ताणें चार चवके आनी एका सक्याचे मजतीन 39 धांवड्यो केल्यो.
हार्दिक पांड्या सको मारपाच्या यत्नांत हसरंगाच्या हातांत कॅच दिवन तंबूत परतलो. अक्षर पटेल आक्रमक बॅटींग करपाच्या मुडांत आशिल्लो. पूण, ताका व्हड खेळी करपाक जमली ना. तो णव बॉलांनी णव धांवड्यो करून बाद जालो. 49वे ओव्हरींत शेंकडो मारपी कोहली बाद जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
