भांगरभूंय | प्रतिनिधी
येजमान भारतान अफगाणिस्ताना आडचे टी-20 माळेंतली पयली मॅच 6 विकेटींनी जिखली. ह्या जैता सयत भारतान अफगाणिस्ताना आडचो जैताचो रॅकॉर्ड कायम राखलो. टी-20 क्रिकेटींत भारताचें हें अफगाणिस्ताना आडचे पांचवें जैत आसा. ह्या जैता सयत भारतान माळेंत 1-0 अशी आघाडी घेतली. दुसरी मॅच 14 जानेवारीक इंदौरांत जातली.
भारताच्या जैतांत अश्टतासांचो खेळगडो शिवम दुबेन मुखेल भुमिका वठयली.
ते पयलीं, अफगाणिस्तानान पयलीं बॅटींग करतना मोहम्मद नबीच्या 42 धांवड्यांच्या नेटार 20 ओव्हरींनी 5 विकेटी वगडावन 158 धांवड्यो केल्यो. मोखीचो फाटलाव करपाक देंविल्ल्या भारतान 18वे ओव्हरींत फकत 4 विकेटी वगडावन जैत मेळयले. अंदूं संवसारीक टी-20 सर्त जातली. ते पयलीं भारताची ही निमाण टी-20 माळ आसा. हे माळे उपरांत भारताचो पंगड इंग्लंडा आड पांच टॅस्टींची माळ खेळटलो. ते उपरांत 23 मार्च सावन आयपीएलाक सुरवात जातली. आयपीएल सोंपल्या उपरांत भारताचो पंगड संवसारीक टी-20 सर्तींत वांटो घेतलो. सर्त वॅस्ट इंडीज आनी अमेरिका ह्या देशांनी जातली.
मजगतीं, अफगाणिस्तानाची सुरवात सावकाश जाली. डावाची सुरवात गुरबाज आनी मुखेली जारदान हांणी केली. भारताचो फास्ट बॉलर अर्शदीप सिंगान मेडन ओव्हरी वरवीं सुरवात केली. पूण, दोगूय ओपरांनी पंगडाक समाधानकारक सुरवात करून दिवपाक येसस्वी थारले. भारताक पयलें येस आठवे ओव्हरींत मेळ्ळें. स्पिनर अक्षर पटेलान गुरबाजाक (23) बाद केलो. विकेटकीपर जितेश शर्मान ताची कॅच धरली.
ते उपरांत जारदान (25) लेगीत फुडले ओव्हरींत तंबूंत परतलो. ताका शिवम दुबेन बाद केलो. रहमत शाह फकत तीन धांवड्यो करून बाद जालो. ते उपरांत उमरजई आनी मोहम्मद नबी हांणी डाव सांबाळ्ळो. उमरजईन 22 बॉलांनी 29 धांवड्यो केल्यो, जाल्यार नबीन 27 बॉलांनी दोन चवके आनी तीन सक्यांचे मजतीन 42 धांवड्यो केल्यो. अखेरेक नजीबुल्लाह जादरानान 11 बॉलांनी 19 धांवड्यो आनी करीम जन्नत हाणें पांच बॉलांनी 9 धांवड्यो करून पंगडाचो स्कोर 158 मेरेन पावयलो.
भारता वतीन मुकेश कुमारान 33 धांवड्यो दिवन दोन, अक्षर पटेलान 23 धांवड्यांनी दोन आनी शिवम दुबेन 9 धांवड्यो दिवन एक विकेट घेतली.
मोखीचो फाटलाव करपी भारताची सुरवात बाबत जाली. रोहित शर्मा पयलेच ओव्हरींत धांवबाद जालो. ते उपरांत शुभमन गिलान पांच चवक्यांचे मजतीन 23 धांवड्यो करून चवथे ओव्हरींत बाद जालो. तिलक वर्मान 26 धांवड्यो करून बाद जालो. ते उपरांत जितेश शर्मा आनी शिवम दुबे भारताचो स्कोर 100 वयर पावयलो.
दुबेन 40 बॉलांनी पांच चवके आनी दोन सक्यांचे मजतीन 60 धांवड्यो केल्यो. विकेटकीपर बॅट्समन जितेश शर्मान 20 बॉलांनी पांच चवक्यांचे मजतीन 31 धांवड्यो केल्यो. रिंकू सिंगान 9 बॉलांनी दोन चवक्यांचे मजतीन 16 धांवड्यो करून शिवमाक बरी साथ दिली. अशे तरेन भारतान 18वें ओव्हरींत सोंपें जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
