भांगरभूंय | प्रतिनिधी
भारतान पयले वन डे मॅचींत येजमान वॅस्ट इंडीजाक 5 विकेटींनी हारयलो. भारतान वॅस्ट इंडीजा आड सेगीत 9वें जैत जोडलें. विंडीजान भारता आड आपलें निमाणे जैत 2019त चेन्नय मेळयिल्लें. त्या वेळार भारताक 8 विकेटींनी हार घेवची पडिल्ली.
मजगतीं, भारतान टॉस जिखून पयलीं विंडीजाक बॅटींग करपाचें आमंत्रण दिलें. रोहित शर्माचो हो निर्णय बॉलरांनी योग्य थारायतना विंडीजाचो डाव 23 ओव्हरींनी 114चेर सोंपयलो. भारतान 22.5 ओव्हरींनी 5 विकेटी वगडावन 118 धांवड्यो करून जैत जोडलें.
भारता आड वॅस्ट इंडीजाचो घरच्या मैदानाचेर खेळटना सगल्यांत उणो स्कोर थारलो. हाचे आदीं 1997त पोर्ट ऑफ स्पेनांत भारता आड 121 धांवड्यांचेर बाद जाल्लो. वट्ट रॅकॉर्डा विशीं विचार केलो जाल्यार भारता आड विंडीजाचो हो दुसरो ल्हान स्कोर आसा. हाचे पयलीं म्हणल्यार 2018त तिरुवंतपूरमांत वॅस्ट इंडीजाचो डाव 104चेर सोंपिल्लो.
संवसारीक वन डे सर्तीची तयारीचे दिश्टीन युवा खेळगड्यांक संद मेळची म्हणून रोहित शर्मा, विराट कोहली हांणी बॅटींग करपाक उसरां मैदानांत देंवपाचो निर्णय घेतलो. बडती मेळिल्ल्या सुर्यकुमार यादव आनी हार्दीक पांड्या हांकां खाशेलें प्रदर्शन करपाक जमलें ना. पूण, ईशान किशनान अर्द शेंकडो नोंदोवन रोहिताचो निर्णय योग्य थारायलो. पूण, 115 धांवड्यांचो फाटलाव करतना भारतान पांच विकेटी वगडायल्यो.
मुखेली रोहीत शर्मान डावाची सुरवात करपाक न येवपाचो निर्णय घेतलो. रोहितान इशान किशन आनी शुभमन गिल हांकां डावाची सुरवात करपाक धाडले. पूण, हे मॅचींत लेगीत फॉर्म मेळोवपा खातीर शुभमन झुजता दिसलो. तो 7 धांवड्यो करून कॅच बाद जालो. तिसरे सुवातेर विराट कोहली येवप अपेक्षीत आशिल्लें. पूण, पंगड वेवस्थापनान सुर्यकुमार यादवाक बडटी दिली. सुर्यान ताच्या भात्यांतले 360 डिग्री फटके मारले. पूण, 19 धांवड्यांचेर एलबीडब्ल्यू बाद जालो. गुडाकेश मोतीन ताका एलबीडब्ल्यू बाद केलो आनी इशाना वांगडा 36 धांवड्यांची भागिदारी फुटली. पांड्या पांच धांवड्यो करून धांवबाद जालो.
चवथी विकेट पडून लेगीत रोहीत आनी कोहली खेळपाक येवंक नाशिल्ल्यान कांय जाणांक अजाप जालें. शार्दुल ठाकूराक (1) बॅटींगेक धाडलो. कारियान उत्कृश्ट बॉलाचेर बाद केलो.
ते उपरांत रोहीत मैदानांत देंवलो. ताणें आनीक विकेटी पडूंक दिल्यो ना आनी भारतान 5 विकेटींनी जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
