भांगरभूंय | प्रतिनिधी
भारतान येजमान श्रीलंका पंगडाक 43 धांवड्यांनी हारोवन तीन टी-20 मॅचींचे माळेंत 1-0 अशी आघाडी घेतली. भारतान दिल्ले 214 धांवड्यांच्या आव्हानाचो फाटलाव करपी श्रीलंकेन बरी सुरवात केली.
ओपनर पथुम निसांका आनी कुसल मॅण्डीस हे जोडयेन भारताच्या बॉलरांक घाम काडलो. तांणी पयले विकेटी खातीर 84 धांवड्यांची भागिदारी केली. श्रीलंकेचो खेळ असोच चालू उरलो जाल्यार भारत सहज हारपाक शकता अशें दिसता आसतना टीम इंडियान जबरदस्त पुनरागमन केलें. अर्शदीप सिंगान मॅण्डिसाक (45) बाद करून भारताच्या चाहत्यांक सुखद धपको दिलो. उपरांत अक्षर पटेल आनी अखेरेक रियान पराग हाणें उत्कृश्ट प्रदर्शन करून भारताक सोंपें जैत मेळोवन दिलें.
श्रीलंका पंगडाक निर्धारीत 20 ओव्हरी लेगीत खेळपाक जमल्यो ना. ताचो डाव 19.2 ओव्हरींनी 170चेर सोंपलो आनी भारतान 43 धांवड्यांनी जैत जोडलें.
श्रीलंका बरे स्थितींत आसतना अक्षर पटेलान भारता खातीर घातक थारपी निसांका आनी कुसल परेरा हांकां बाद करून मॅचींत उमळशीक हाडली. पथुम निसांका (79) आनी मॅण्डीस बाद जाल्या उपरांत भारताच्या बॉलरांनी मॅचीचेर घट पकड मेळयली. ते उपरांत थारावीक अंतरान विकेटी पडत गेल्यो.
भारता वतीन रियान परागान सगल्यांत चड तीन विकेटी घेतल्यो. अर्शदीप सिंग आनी अक्षर पटेलान दोन जाल्यार मोहम्मद सिराज आनी रवी बिश्नोई हांणी एकेक विकेट घेतली.
ते पयलीं भारताचो ओपनर यशस्वी जयस्वाल, शुभमन गील, मुखेली सूर्यकुमार यादव आनी ऋषभ पंत हांणी आक्रमक बॅटींग केली. सूर्यान अर्द शेंकड्याची खेळी करून भारताचो स्कोर 200च्या वयर पावयलो. ताणें दोन सके आनी आठ चवक्यांचे मजतीन 26 बॉलांनी 58 धांवड्यो केल्यो. ताचे खेरीत पंतान 1 सको आनी स चवक्यांचे मजतीन 33 बॉलांनी 49 धांवड्यो केल्यो. जयस्वालान 40, गिलान 34 धांवड्यांचें योगदान दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.