भांगरभूंय | प्रतिनिधी
भारतान 19 वर्सां पिराये सकयले संवसारीक क्रिकेट सर्तीचे सुपर-6 फेरयेंतले आपले पयले मॅचींत न्युझिलॅण्डाक 214 धांवड्यांनी हारयलो.ब्लोमफोंटेनांत न्युझिलॅण्डान टॉस जिखून भारताक पयलीं बॅटींग करपाचें आमंत्रण दिलें. भारतान निर्धारीत 50 ओव्हरींनी 8 विकेटी वगडावन 295 धांवड्यो केल्यो. जैता खातीर 296 धांवड्यांचो फाटलाव करपी न्युझिलॅण्डाचो डाव 28.1 ओव्हरींनी फकत 81 धांवड्यांचेर सोंपलो.
भारताचो अश्टतासांचो खेळगडो मुशीर खानान 131 धांवड्यांची उत्कृश्ट खेळी केली. जाल्यार बॉलिंगेंत सौम्य पांडेन 4 विकेटी घेतल्यो. भारत आतां आपली फुडली मॅच नेपाळा आड 2 फेब्रुवारीक खेळटलो.
मुशीरान 126 बॉलांनी 131 धांवड्यांची खेळी केली. हे सर्तींत अजून मेरेन दोन शेंकडे आनी अर्द शेंकडो मारला. गट पांवड्यार अमेरिका पंगडा आडचे मॅचींत मुशीरान 76 धांवड्यांची खेळी केल्ली. जाल्यार आयर्लेण्डा आड 106 बॉलांनी 118 धांवड्यांची खेळी केल्ली.
मुशीर आतां शिखर धवनाच्या विक्रमाच्या लागसार आसा. धवनान 2004त जाल्ले संवसारीक 19 वर्सां पिराये सकयले क्रिकेट सर्तींत तीन शेंकडे मारिल्ले.
मजगतीं, आदर्श सिंग आनी अर्शिन कुलकर्णी हाणें डावाची सुरवात केली. अमेरिका पंगडा आड शेंकडो मारपी कुलकर्णीन काल फकत 9 धांवड्यो करून बाद जालो. जाल्यार आदर्श सिंगान सर्तींतलो आपलो दुसरो अर्द शेंकडो पुर्ण केलो. ताणें 58 बॉलांनी 52 धांवड्यो केल्यो. ताणें मुशीर खाना वांगडा 77 धांवड्यांची भागिदारी केली.
तिसरे सुवातेर बॅटिंगेक आयिल्ल्या मुशीर खानान सुरवाती सावन आकर्शक शॉर्ट मारले. चवथे सुवातेर खेळपी मुखेली उदय सहारनान ताका बरी साथ दिली. दोगांयनी 113 बॉलांनी 87 धांवड्यांची खेळी केली. हे भागिदारीक लागून न्युझिलॅण्डाचेर चेपण आयलें. सहारनान 57 बॉलांनी 34 धांवड्यो केल्यो.
विकेटकीपर बॅट्समन अरवेल्ली अवनीशान 17, प्रियांशू मोलियान 10, मुरुगन अभिषेकान 4 आन सचिन धासान 15 धांवड्यो केल्यो. न्युझिलॅण्डा वतीन मेसन क्लार्कान सगल्यांत चड 4 विकेटी घेतल्यो.
मोखीचो फाटलाव करपी न्युझिलॅण्डाच्या एकाय बॅट्समनाक व्हड खेळी करपाक जमली ना. डावाची सुरवात करपी टॉम जॉन्स पयल्याच बॉलाचेर बाद जालो. जेम्स नेल्सनाक 10 धांवड्यो करप शक्य जाल्यो. न्युझिलॅण्डाचो एका फाटल्यान एक बॅट्समन बाद जायत गेलो.
भारता वतीन सौम्य पांडेन सगल्यांत चड 4 विकेटी घेतल्यो. राज लिंबानी आनी मुशीर खान हांकां 2-2 विकेटी फावो जाल्यो. अर्शिन कुलकर्णी आनी नमन तिवारी हांकां 1-1 विकेट फावो जाली.
सौम्य पांडेन सर्तींत अजून मेरेन 12 विकेटी घेतल्यात, आनी सर्तींत सगल्यांत चड विकेटी घेवपाचे वळेरेंत जोड रितीन पयले सुवातेर पावला. पाकिस्तानाच्या उबैद शाहान लेगीत 12 विकेटी घेतल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
