भांगरभूंय | प्रतिनिधी
नवी दिल्ली, खबरां संस्था ः भारताक 2025 वर्साच्या निमाणे मेरेन एस-400 हवाई संरक्षण प्रणालींचो चवथो स्क्वाड्रन मेळपाची शक्यताय आसा. इंडिया टुडे खबरां प्रमाण, एस-400 स्क्वाड्रन डिसेंबर मेरेन भारतांत पावूंक शकता. आनी पांचवो आनी निमाणो स्क्वाड्रन 2026 वर्सां येवपाचो आसा. 2018 वर्सा भारत आनी रशियेन एस-400 च्या पांच स्क्वाड्रना खातीर 35 हजार कोटी रुपयांची कबलात केल्ली. तातूंतले 3 स्क्वाड्रन चीन आनी पाकिस्तान शिमेचेर तैनात आसात. 2 आजूनूय येवपाचे आसात.
एस-400 स्क्वाड्रनांत 16 वाहनां आसतात, तातूंत लाँचर, रडार, नियंत्रण केंद्रां आनी सहाय्यक वाहनां हांचो आस्पाव आसा. तातूंत 600 किमी. मेरेनच्या लक्ष्यांचो सोद घेवंक मेळटा आनी ताची लक्ष्य इंगेजमेंट रेंज 400 किमी आसा.
एस-400 प्रणाली म्हणल्यार कितें?
एस-400 ही हवाई संरक्षण प्रणाली आसा. हाका लागून हवेंतल्यान जावपी हल्ले आडावंक मेळटात. दुस्मान देशांच्या क्षेपणास्त्रां, ड्रोन, रॉकेट लाँचर आनी झुजारी विमानांतल्यान हल्ले जावचे न्हय म्हूण ही प्रणाली प्रभावी थारता. रशियेच्या आल्माझ सेंट्रल डिझायन ब्युरोन ही प्रणाली तयार केल्या. संवसारांतल्या सगळ्यांत आधुनिक हवाई संरक्षण प्रणालीं मदीं तिचो आस्पाव जाता.
एस-400 कितें खाशेलें आसा?
० एस-400 मदले 400 हे प्रणालीच्या वर्गाचें प्रतिनिधित्व करतात. रशियेकडल्यान भारताक मेळिल्ली ही प्रणाली 400 किलोमीटर अंतरावेल्यान लक्ष्य सोदून काडटा. दुस्मानाक तें सहजपणान कळना.
० एस-400 चें सगळ्यांत व्हडलें खाशेलपण म्हळ्यार ताका रस्त्यान खंयच्याय सुवातेर व्हरपाक मेळटा.
० हांतूत 92N6E इलेक्ट्रॉनिकली स्टीअर्ड फेज्ड अॅरो रडार आसता जो सुमार 600 किलोमीटर अंतरावेल्यान जायते लक्ष्य सोदून काडूंक शकता.
० ऑर्डर मेळ्ळ्या उपरांत 5 ते 10 मिनटां भितर तो वापरपाक तयार जाता.
० एस-400 चे एक युनिट एकाच वेळार 160 वस्तूंचो सोद घेवंक शकता. एकाच लक्ष्याचेर 2 क्षेपणास्त्रां उडोवंक मेळटात.
० 30 किलोमीटर उंचायेवयल्यान लेगीत ती आपल्या लक्ष्याचेर हल्लो करपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
