भांगरभूंय | प्रतिनिधी
भारतान 19वे आशियायी खेळाच्या 11व्या दिसा तीन भांगरा पदकां जिखलीं. दिसाचें पयलें भांगरा पदक नेमबाजी मिश्र गटांत मेळ्ळें. ते उपरांत ऑलिम्पीक चॅम्पीयन नीरज चोपडान मेळोवन दिलें, जाल्यार तिसरें भांगरा पदक दादल्यांच्या 4 बाय 400 मिटर रिले पंगडान मेळयलें.
भारतान काल तीन भांगरा पदकां खेरीत पांच रुप्या पदकां आनी चार कांश्या पदकां जिखलीं. अशे तरेन भारतान खेळाच्या 11व्या दिसा आपल्या पदकांची संख्या 81चेर व्हेली.
ह्या पदकांचे मजतीन भारतान आशियायी खेळाच्या इतिहासांत सगल्यांत चड पदकां जिखपाचो पराक्रम केलो. फाटले आशियायी खेळांत भारतान 70 पदकां जिखिल्लीं.
भारतान नेमबाजीच्या मिश्र कम्पावण्ड प्रकारांत दिसाचें पयलें भांगरा पदक जिखलें. भांगरा पदकाचे मॅचींत ओजस प्रवीण आनी ज्योती सुरेखा हे भारताचे जोडयेन कोरियाचे जोडयेक 159-158 अशा स्कोरान हारयली. चायना तायपेक रुप्या पदक फावो जालें.
फालो फेक प्रकारांत सध्याचो वस्ताद नीरज चोपडान हंगामांतलो उत्कृश्ट थ्रो करीत आपल्या किताबाची राखण केली. ताणें 88.88 मिटराचें अंतर हुपलें. रुप्या पदक लेगीत भारताकूच फावो जालें. किशोर कुमार जेनान 87.54 मिटरा मेरेन भालो मारून दुसरी सुवात मेळयली. किशोर कुमारान पॅरीस ऑलिम्पिकाची पात्रताय मेळयली.
दिसाचें तिसरें भांगरा पदक दादल्यांच्या पंगडान चार बाय 400 मिटर रिलेंत मेळोवन दिलें. भारताच्या धांवप्यांनी तीन मिनटां 01ः58 सेकंदांनी सर्त पुर्ण करून राष्ट्रीय विक्रम लेगीत नोंदयलो. भारता वतीन मोहम्मद अनस, अमोज जम्बो, मोहम्मद अजमल आनी राजेश रमेश हाणें वांटो घेतलो. कतराक रुपें आनी श्रीलंका पंगडाक कांश्या पदक फावो जालें.
35 किमि रेस वॉकांत कांशें
भारतान 35 किमि रेस वॉक मिश्र सांघीक गटांत कांश्या पदक जिखलें. भारताच्या पंगडांत राम बाबू आनी मंजू राणी हाणें मेळून 5 वरां आनी 51 मिनटां आनी 14 सेकंदांनी सर्त पुर्ण केली. हातूंत राम बाबून 2 वरां 42 मिनटां आनी 11 सेकंदांनी जाल्यार मंंजून 3 वरां 9 मिनटां आनी तीन सेकंदांनी सर्त पुर्ण केली. चीनान भांगरा पदक जिखलें.
स्क्वॉशः अनाहत-अभय जोडी सेमींत हारली
अनाहत सिंग आनी अभय सिंग हे जोडयेक स्क्वॉशाच्या मिश्र गटांत कांश्या पदक फावो जालें. भारताचे जोडयेक मलेशियाचे जोडये कडल्यान 9-11 फरकान हार घेवची पडली. ताका लागून भारताचे जोडयेक कांश्या पदकाचेर समाधान मानचें पडलें.
बॉक्सींगः लवलीनाक रुपें, परवीनाक कांशें
भारताची बॉक्सर लवलीनाक बायलांचे 75 कील वजन गटांतले फायनलींत चीनाचे ली क्विआना कडल्यान 0-5 अशा फरकान हार घेवची पडली. हे हारीक लागून लवलीनाक रुप्या पदकाचेर समाधान मानचें पडलें. तशेंच बायलांचे 57 कीलवजन गटांत परवीन हिका सेमी फायनलींत चीनी तायपेचे बॉक्सरा आड 0-5 हार घेवची पडली. हे हारीक लागून परवीनाक कांश्या पदक फावो जालें.
कुस्तीः सुनीलान पदकाचें खातें उगडलें
सुनील कुमारान दादल्यांच्या ग्रीको-रोमन 87 कील वजन गटांत किर्गिस्तानाच्या अताबेक अजीसबेकोवाक 2-1 हारोवन कांश्या पदक जिखलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
