भांगरभूंय | प्रतिनिधी
भारतान इंग्लंडाक दुसरे टॅस्टींत 106 धांवड्यांनी हारोवन पांच टॅस्टींचे माळेंत 1-1 अशी बरोबरी सादली. इंग्लंडाचो दुसरो डाव 292चेर सोंपलो. पयल्या डावांत यशस्वी जयस्वालान दोट्टी शेंकडो मारून आनी जसप्रीत बुमराच्यो 6 विकेटी घेवन भारताचो शेक दवरपाक मजत केल्ली, जाल्यार दुसरो डाव शुभमन गिल आनी स्पिनरांनी गाजयलो.
भारतान इंग्लंडा मुखार जैता खातीर 399 धांवड्यांची मोख दवरिल्ली. ताचो फाटलाव करतना इंग्लंडाचो दुसरो डाव 292चेर सोंपलो. पयल्या डावांत ताणें 253 धांवड्यो केल्ल्यो. भारताक पयल्या डावांत 143 धांवड्यांची आघाडी मेळिल्ली. शुभमन गिलाच्या शेंकड्या नेटार भारतान दुसऱ्या डावांत 255 धांवड्यो केल्ल्यो.
दुसऱ्या डावांत भारता वतीन जसप्रीत बुमरान 3, आर आश्विनान 3, अक्षर पटेल, कुलदीप यादव आनी मुकेश कुमार हाणें दरेकी एक विकेट घेतली.
मॅचीच्या चवथ्या दिसाची सुरवात इंग्लंडान सकारात्मक केली. नायट वॉचमॅन रेहान अहमद आनी क्रॉली हाणें आक्रमक बॅटींग करून इंग्लंडाचो स्कोर हालयत दवरलो. पूण, 95 धांवड्यांचेर इंग्लंडाक दुसरो धपको बसलो. स्पिनर अक्षर पटेलाच्या बॉलाचेर रेहान स्टम्प बाद जालो. ताणें 31 बॉलांनी 23 धांवड्यो केल्यो.
इंग्लंडाक 132चेर तिसरो धपको बसलो. पयले मॅचींत इंग्लंडाक जैत मेळोवन दिवपाक मोलादीक योगदान दिवपी ओली पॉपाक ऑफ स्पिनर आर आश्विनान बाद केलो. मुखेली रोहीत शर्मान स्लिपांत उत्कृश्ट कॅच धरली. ओलीन 21 बॉलांनी 23 धांवड्यो केल्यो. हे मजगतीं क्रॉलीन अर्द शेंकडो मारलो. इंग्लंडाक जैता खातीर 250 धांवड्यांची गरज आशिल्ली आनी भारताक 7 विकेटींची गरज आशिल्ली. हे मजगतीं, आश्विनान इंग्लंडाक सेगीत दुसरो धपको दिलो. ताणें जो रुटाक बाद केलो. अक्षर पटेलान ताची कॅच धरली. रुटान 16 धांवड्यो केल्यो. इंग्लंडान 154 धांवड्यांचेर आपली चवथी विकेट वगडायली.
अर्द शेंकड्या उपरांत लेगीत क्रॉलीन आक्रमक बॅटींग कायम दवरली. ताका जॉनी बॅयरस्टोक बरी साथ लाबली. पूण, 42वे ओव्हरींत कुलदीप यादवान क्रॉलीक बाद केलो. ते उपरांत फुडले ओव्हरींत जसप्रीत बुमरान बॅयरस्टोक बाद केलो. जेवणाच्या विसवा पयलीं इंग्लंडाक 196 धांवड्यांचेर सवो धपको बसलो.
इंग्लंडान स विकेटी वगडावन 200 धांवड्यांचो टप्पो हुपलो. बेन फॉक्स आनी मुखेली बेन स्टोक्स हे डाव सांबाळटले अशें दिसतालें. पूण, 220चेर श्रेयस अय्यराच्या उत्कृश्ट थ्रोचेर स्टोक्स धांबवाद जालो.
आठवे विकेटी खातीर बेन फॉक्स आनी टॉम हार्टले हांणी 50 धांवड्यांची भागिदारी पुर्ण केली. इंग्लंडाक 275 धांवड्यांचेर आठवो धपको बसलो. जसप्रीत बुमरान ताचेच बॉलिंगेचेर फॉक्साची कॅच धरली. फॉक्सान 69 बॉलांनी 36 धांवड्यो केल्यो. ताणें टॉम हार्टली वांगडा 55 धांवड्यांची भागिदारी केली.
इंग्लंडाक 275 धांवड्यांचेर आठवो धपको बसलो. बुमरान ताच्याच बॉलाचेर बेन फॉक्साची कॅच धरली. फॉक्सान 69 बॉलांनी 36 धांवड्यांची खेळी केली. 281चेर मुकेशान बशीराक बाद केलो. ताका खातें लेगीत उगडपाक जमलें ना. अखेरेक बुमरान 36 धांवड्यांचेर खेळपी टॉम हार्टलेक बोल्ड करून इंग्लंडाचो डाव सोंपयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
