भांगरभूंय | प्रतिनिधी
भारत आनी दक्षीण आफ्रिका ह्या बायलांच्या क्रिकेट पंगडां मदीं चालू आशिल्ले एकोडे टॅस्टीच्या चवथ्या दिसा येजमान भारतान 10 विकेटींनी जैत जोडलें.
भारताच्या पंगडान सांघीक प्रदर्शन केलें आसलें तरी जैतांत शेफाली वर्मा आनी स्नेह राणा हांचें म्हत्वाचें योगदान आशिल्लें. शेफालीन पयल्या डावांत दोट्टी 197 बॉलांनी 205 धांवड्यो केल्ल्यो, तिणें 23 चवके आनी आठ सके मारिल्ले. जाल्यार राणान पयल्या डावांत 77 धांवड्यो दिवन 8 विकेटी घेतिल्ल्यो.
भारताक जैता खातीर चवथ्या डावांत फकत 37 धांवड्यांची मोख मेळिल्ली. शेफाली वर्मा आनी शुभा सतीश हे जोडयेन ही मोख मेळोवन दिली. भारतीय बायलांच्या क्रिकेट इतिहासांत दुसरे खेपे 10 विकेटींनी जैत जोडलें. शेफाली वर्मान नाबाद 24 आनी शुभा सतीशान नाबाद 13 धांवड्यो केल्यो.
भारतान पयलीं बॅटींग करतना 6 बाद 603 धांवड्यांचेर पयलो डाव घोशीत केल्लो. ते उपरांत दक्षीण आफ्रिकेचो पयलो डाव 84.3 ओव्हरींनी 266चेर सोंपयिल्लो. भारता वतीन स्नेह राणान 25.3 ओव्हरींनी 77 धांवड्यो दिवन 8 विकेटी घेतिल्ल्यो. भारताक 337 धांवड्यांची आघाडी मेळिल्ली. ताका लागून दक्षीण आफ्रिकेक फॉलोनाक तोंड दिवचें पडलें. दुसऱ्या डावांत ताणें बरी बॅटींग केली. पूण, हार वाटावपाक ताका जमूंक ना. स्युन ल्युसाच्या 109 आनी मुखेली लॉरा वोल्वार्डाच्या 122 धांवड्यां नेटार स्कोर आफ्रिकेन आपलो स्कोर 154.4 ओव्हरींनी 373 मेरेन पावयलो.
बोल्वार्डान 314 बॉलांक जाल्यार ल्युसान 203 बॉलांक तोंड दिलें. ह्या दोगां खेरीत नादिन डी क्लार्कान 61 धांवड्यांचें योगदान दिलें.
दुसऱ्या डावांत स्नेह राणा, दिप्ती शर्मा आनी राजेश्वरी गायकवाड हांणी दरेकी 2 विकेटी घेतल्यो. पुजा वस्त्रकर, शेफाली वर्मा आनी हमनप्रीत कौर हिका एकेक विकेट फावो जाली.
स्नेह राणान मॅचींत वट्ट 10 विकेटी घेतल्यो. शेफाली वर्मान पयल्या डावांत 205 जाल्यार स्मृती मंधानान 149 धांवड्यांची खेळी केल्ली. तशेंच ऋचा घोशान 86 आनी मुखेली हरमनप्रीत कौरान 69 धांवड्यांचें योगदान दिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
