भांगरभूंय | प्रतिनिधी
नवी दिल्ली, खबरां संस्था ः भारतान 30 किलवॅट लेसर आदारीत डायरेक्टेड एनर्जी वेपन (DEW) Mk-II (A)प्रणालीची चांचणी केल्या, जी दुस्मानाचे शस्त्रांचें फिक्स्ड-विंग ड्रोन, स्वार्म ड्रोन, क्षेपणास्त्रां आनी नदर दवरपी सेन्सर नश्ट करपाक शकता.
हाचे वांगडा भारतूय ही बळिश्ट लेसर शस्त्र प्रणाली आशिल्ल्या देशांच्या वळेरेंत आस्पावला. आतां मेरेन अमेरिका, चीन, इझ्रायल, रशिया ह्या सारक्या देशांनीच ही प्रणाली आशिल्ली.
ह्या लेसर आदारीत शस्त्र प्रणालीची चांचणी आंध्र प्रदेशांतल्या कुर्नूल हांगाच्या नॅशनल ओपन एअर रेंज (NOAR) हांगा जाली. ही फकत सुरवात, डीआरडीओ जायत्या तंत्रगिन्यानाचेर काम करता. जें तुमकां स्टार वॉर्स क्षमताय दितलें अशें डीआरडीओचे अध्यक्ष समीर व्ही कामत हांणी सांगलें.
लेसर प्रणाली कशी काम करता?
डीआरडीओन उच्च उर्जा प्रणाली केंद्र, चेस डिझायन विकसित केला. एलआरडीई, आयआरडीई, डीएलआरएल आनी देशांतल्या मुखेल शिक्षणीक संस्थांनी आनी उद्देगांनी तातूंत वांटो घेतिल्लो. ही पद्दत पुराय स्पेक्ट्रमांत काम करताली. DEW हांणी ड्रोन उडयले, नदर दवरपी एंटीना जळयले आनी दुस्मानाचे सेन्सर उडयले. जेन्ना रडार वा तातुंतल्या इलॅक्ट्रो-ऑप्टिक (EO) प्रणाली वरवीं लक्ष्य सोदून काडटात तेन्ना DEW उजवाडाच्या वेगान ताचेर हल्लो करून लेसर किरणान ताचो नाश करूंक शकता. जाका लागून वस्तू काम करपाक बंद जावंक शकता. लेसर किरणान वॉरहेडाक लक्ष्य केल्यार प्रभावी परिणाम मेळूंक शकतात.
भारतीय सैन्याक ताचो फायदो कसो जाता?
हे पद्दतीचें खाशेलें खाशेलपण म्हळ्यार तातूंत कसलोच दारुगुळो वा रॉकेट वापरपाची गरज ना. तो फकत उजवाडान हल्लो करतलो. तातुंतल्यान ड्रोन हल्ल्याचो पंगड एकाच वेळार नश्ट करूं येता. मूक ऑपरेशन म्हळ्यार आवाज नासतना, धुंवर नासतना, लक्ष्य नश्ट करतलें. झुजाच्या मैदानाचेर नेटान प्रतिसाद दिवपी आनी उणी देखरेख आशिल्ली पद्दत, म्हळ्यार एक-दोन लिटर गॅसोलीनाच्या खर्चा परस उण्या मोलान ती चलोवंक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
